LUGAIT, Misamis Oriental (PIA) – Midagsa ang mga lumolupyo ning lungsod ngadto sa bag-o pa lamang gi-renovate nga Lugait Sports Complex kung asa gipangunahan sa munisipyo ang pagpahigayon sa usa ka Jobs Fair nga gidumala ni Public Employment Service Office (PESO) Manager Arnel Balnaga, atol sa ika-64 nga selebrasyon sa Adlaw sa Lugait, Marso 12.
Gipasabot ni Mayor Wellie Lim ngadto sa katawhan nga ang gipahigayong Jobs Fair, “15 na ka-tuig ang milabay sukad nila gihimo ug karon pa nahibalik.
“Nagtuo ko nga dako kini’g matabang aron ang lungsod padayong maningkamot sa tumong nga makab-ot ang single digit poverty incidence. Sa milabay nga tuig, ang poverty incidence sa Lugait naa sa 23 percent. Nikunhod kini ngadto sa 16 percent tungod sa mga oportunidad alang sa katawhan nga mahatagan og trabaho,” sumala sa mayor.
Kauban usab si Vice Mayor Roger Lim sa kasaulogan sa Adlaw sa Lugait.
“Akong panghinaut kaninyo nga nag-apply og trabaho nga kamo magmalampuson. Good luck,” matud sa vice-mayor.
Sa Jobs Fair, pito ang lokal nga mga employer ug dunay dugang 3 ka mga employer gikan sa gawas sa lungsod ang nangita og mga trabahante. (Lugait MCO/PIA Misamis Oriental)
