SYUDAD SANG ILOILO (PIA6) – Ginhingyo sang Philippine Health Insurance Corporation (PhilHealth)-6 ang publiko nga magparehistro kag gamiton ang KonSulTa (Konsultang Sulit at Tama) sang ahensya para makabulig sa ila kinahanglanon pang medikal..
Sa ginhiwat nga Media Pasasalamat sang ahensya sang Nobyembre 29, ginpahayag ni Janimhe C. Jalbuna nga Public Affairs Unit head sang PhilHealth-6 nga pila sa mga diagnostic services nga pwede mahatag sa publiko pinaagi sa programa amu ang CBC with Platelet Count, Urinalysis, Fecalysis, Septum Microscopy, Fecal Occult Blood, Pap Smear, Lipid Profile, Fasting Blood Sugar, ECG, Chest X-ray, Creatinine, and HBA 1C Test; samtang ang libre nga bulong naman amu ang anti-microbial, anti-asthma, fluid and electrolytes, anti-diabetic, anti-hypertensive, antipyretics, kag antihistamine.
Para magamit ang package, kinahanglan sang myembro nga mag parehistro sa accredited KonSulta provider; magpasa sang KonSulTa registration form; kuhaon ang confirmation receipt sini nga may ara code ukon Authorization Transaction Code (ATC); ihatag ang ATC san PhilHealth KonSulTa facility para sa pauna nga konsultasyon; kag ipasa ang natapos nga Eectronic Konsulta Availment Skip (eKAS) sa KonSulTa facility.
Sa datos sang PhilHealth-6 sang Oktubre 2023, may ara na 151 ka accredited Konsulta Package Providers (KKPs) sa Kabisay-an Nakatungdan, kung sa diin may ara 57 ang sa Iloilo, 34 sa Negros Occidental, 26 ka Antique, 20 sa Aklan, 10 sa Capiz, kag apat sa Guimaras.
Pinaagi sa mga KKPs, ara na sa 145,301 ka mga myembro sang PhilHealth-6 ang nakabenepisyo sa programa. Naglab-ot naman sa P10.9 milyon ang nabayran na sang ahensya nga benefit claims sang KKPs sa rehiyon.
Yara naman na sa 7.23 milyon nga indibidwal sa rehiyon ang narehistro sa database sang PhilHealh Agosto subong nga tuig.
Pinakadamo diri ang sa Guimaras nga may 92.48 percent ukon 176,055 nga membership registration, ginsundan sang Iloilo nga may 91.35 percent; Capiz (91.27 percent); Aklan (88.83 percent); Negros Occidental (88.82 percent); kag Antique (87.15 percent).
Sa pihak nga bahin, wala pa sang may nabaton nga pagsulundan ang ahensya natuhoy sa pagpatuman sang 5 percent premium rate kada bulan umpisa 2024.
Ang pag-adjust sang premium rate nasandig sa Republic Act (RA) 11223 ukon Universal Health Care Act nga nagatalana sang premium contributions halin 2019 tubtob 2025. (AAL/JNH/PIA Iloilo)
