KALIBO, Aklan (PIA) — Nakataeana nga magpatigayon it “Konsulta-Run-Na” ro Philippine Health Insurance Corporation (PhilHealth) iya, sa handum nga pabaskugon pa gid ro kampanya sa andang programa nga Konsultasyong Sulit at Tama (Konsulta).
Ro Konsulta-Run-Na hay isaea ka 6-kilometro nga pagdaeagan nga pagahiwaton sa Mayo 24, 2025, alas 5:00 it agahon, nga magaumpisa sa Kalibo Pastrana Park, magaliko sa may entrada it Kalibo International Airport, ag magatapos sa Andagao Covered Court.
Kaparehos man nga aktibidad ro pagahiwaton sa Mayo 31, 2025 sa Isla it Boracay sa banwa it Malay.
Ro Boracay Konsulta-Run-Na mat-a hay may daywa nga kilometro ro kaeayuon, halin sa Station 1 (Groto) paadto sa Station 2 (Hennan Regency).
“Tanan hay ginakangay gid namon nga mag-intra sa Konsulta-Run-Na. Kaparehos it PhilHealth, raya hay para sa tanan, para sa kada Pilipino,” hambae ni PhilHealth-Aklan Social Insurance Officer III Aimy Joy Desaporado sa programa sa radyo it PIA-Aklan nga Kapihan sa RMN-Kalibo.
Uwa it bayad sa pagparehistro. Ro mga interesado nga runner hay ginaengganyo nga magparehistro online, pinaagi sa link nga https://forms.gle/TJyZYwBoiQJHRB8t9 ukon mahimo mag-agto sa PhilHealth Office, ukon pwede man sa adlaw mismo it programa bag-o mag-umpisa.
Ro probisyon sa Race Bib hay first come, first serve basis eamang. Nagprerar ro PhilHealth-Aklan it mga 2,000 ka mga race bib para maakomodar ro tanan nga mga partisipante, ag raya hay igapanupod antes mag-umpisa ro daeagan.
“Rayang paaeabuton nga kahiwatan hay isaea sa mga euobrahon it PhilHealth para mas mapabaskog ro promosyon it Konsulta. Amon ginatuyo nga ro Konsulta Package mahisayuran gid it sangka tagsa ka mga Aklanon,” hambae ni Desaporado.
Suno kay Desaporado, base sa andang assessment, mga 20 porsyento eamang it mga Aklanon ro nakasayod nga ro andang aktwal nga ginaobra hay isaea eon gale nga Konsulta Package.
“Makasueobo gid man ra pero ginahimo gid namon ang tanan sa amon masarangan nga ro flagship program ngara it PhilHealth hay maipakilala gid sa tagsa ka Aklanon ag sambilog sa harang inisyatibo hay sa harang Mayo 24 nga Konsulta-Run-Na, nga may mga nagkaeain-eain nga mga aktibidades nga syempre naka-angkla sa Konsulta,” dugang pa nana.
Sambilog kara hay ro Zumba dance nga matabo antes (Pastrana Park) ag pagkatapos (Andagao Covered Court) it PhilHealth run.
Sa Andagao Covered Court, pagahiwaton ro Konsulta Package ag Universal Health Care orientation sa mga miyembro ag indi miyembro nga mga partisipante agud mas masayuran pa gid nanda ro programa.
Kaparte man it programa ro pagparehistro sa Konsulta ag ro natawag nga first patient-encounter para mas maapresyar pa guid nanda ro kahueugan it pagparehistro ag pag-angkon sa programa.
Ro Dr. Rafael S. Tumbokon Memorial Hospital hay pagadaehon ro anda ga mobile clinic kung siin magatao sanda it libreng pagpa X-ray ag ibang laboratoryo.
Makahimo man it konsultasyon ag inquiries ro mga partisipante sa mga doctor, nars, ag iban pa nga mga frontliners nga magaintra man sa nasambit nga programa.
Magadaea man ro PhilHealth-Aklan it andang Registration Team agud bue-on man ro kahigayunan nga ma-engganyo ro mga indi miyembro nga mangin rehistrado nga miyembro it PhilHealth.
Ro mga interesado nga indibidwal nga mangin miyembro it PhilHealth hay magdaea eamang it bisan ano nga identification card ukon dokyumento agud makapadayon sa pagparehistro kaibahan ro ginpun-an nga pormas nga igapanupod man sa nasambit nga tyempo.
Ginapasalig it PhilHealth-Aklan ro kaeuowasan it mga partisipante bangud lubos nga gin-koordinar ro aktibidad sa mga partner nga mga ahensya kapareho it LGU-Kalibo, PNP, BFP, MDRRMO/ PDRRMO, Red Cross, BJMP, kag media, ag iba pa.
May mga premyo ag sertipiko nga igatao sa mga magadaug ag may ina man nga mga consolation prizes.
Ro Konsulta Package, hay isaea ka flagship program it PhilHealth, nga kung siin mas pinaeapad ro primary care benefit it ahensya. Sakop kara ro mga individual-based nga mga serbisyo sa ikamayad nga eawas, kaibahan ro inisyal ag follow-up nga primary care consultation, health screening ag assessment, ag access sa pilang mga diagnostic services, ag mga bueong. (AGP/SQP/PIA Aklan)
