SAN JOSE, Antique (PIA) – Gindara ang PhilHealth AlaGa Ka Campaign kag Konsultasyong Sulit at Tama (KonSulTa) sa banwa kang Bugasong.
Kaimaw kang Rural Health Unit (RHU) kang Bugasong, sanda naghiwat kang onsite updating kag profiling sa mga miyembro sa Bugasong Gymnasium.
Si PhilHealth Antique information officer Cherish Ly Ariola nagkuon nga may masobra 500 ang nag-agto nga kliyente, lakip na ang mga kamal-aman, katawhan nga may kasablagan sa lawas, kag miyembro kang Indigenous People (IP) communities ukon tumanduk nga nakalista sa PhilHealth registry.
Ang mga bag-ong rehistro nga mga miyembro gintugruan man kang on-the-spot PhilHealth updates kag konsultasyon nga ginpangunahan ni Cherry Ann Capendit kag Jennilyn Delgado.
Ang dya nga lihuk ginsuportahan kang mga katawhan agud anda man maintindihan ang mga programa kag benepisyo kang PhilHealth.
Ang RHU nagpatigayon man kang medical consultation sa mga miyembro.
Ang dyang AlaGa Ka Campaign and KonSulTa On-Site Updating nagatuyo sa pagpainitindi sa mga miyembro ang anda benepisyo lakip na ang KonSulTa Package nga nagatao kang libre nga konsultasyon, bulong, laboratory tests, kag iba pa nga serbisyo sa ikaayong lawas.
Ginpasalamatan ni PhilHealth Antique Chief Health Insurance Officer Junie Sabusap ang RHU Bugasong kag non-government organizations, lakip na ang International Care Ministries (ICM) kag Philippine Business for Social Progress (PBSP) sa anda suporta sa nasambit nga programa.
Ginpasiguro ni Sabusap nga ang PhilHealth handa sa pagtuman kang anda misyon nga matugru-an ka serbisyo sa ikaayong lawas ang mga miyembro. (AGP/PSM/PIA Antique kaimaw ang mga balita halin kay JYD/UA intern)
