TAGBILARAN CITY, Bohol (PIA) — Gikan sa tag P4,000 ang coverage, gipadak-an na ngadto sa P6,350 ang benefit package rate sa matag hemodialysis session, sukad pa niadtong Octobre 9, 2024.
Ug matud pa sa PhilHealth, kini aron maseguro nga dili na mo-abag pa sa galastohan ang pasyente nga ipaagi sa dialysis tungod sa Chronic Kidney Disease (CKD) Stage 5.
Basta malista ug rehistrado na sa PhilHealth Dialysis Database (PDD), dugang sa PhilHealth pinaagi ni Tess Abella, may libre na nga 156 ka hemodialysis sessions matag tuig, o kinatibuk-an nga P990,600 nga kantidad sa dialysis treatment ang ibayad sa Philhealth para sa pasyente matag tuig.
Gani, gipasabut ni Abella nga ang rate nga gihisgutan, parehas na sa public o private dialysis centers.
Hinuon, sa mga private dialysis centers, mahimo nga ang mga nephrologists, mangayo og professional fees nga katumbas sa P450 sa ilang serbisyo.
Ang hemodialysis, usa ka proseso sa paglimpyo sa dugo, dala na sa kapakyas sa bato (kidney) sa lawas sa paghimo sa iyang trabaho.
Gamit ang makina nga may espesyal nga filter nga gitawag og dialyzer aron maoy molimpyo sa hugaw nga dugo ug tubig, ang mahibilin nga nalimpyo na nga dugo ug tubig, ibalik usab gihapon sa lawas.
Aron usab kalikayan ang perming tusok sa matag dialysis session, maghimo ang surgeon og vascular access aron mas sayun na nga limpyohan ang dugo famit ang fistula o plastic nga tubo nga derecho ngadto sa blood vessels.
Sa panahon sa dialysis session, itusok ngadto sa vascular access ang duha ka dagum, usa niini mohigop sa dugo gawas sa lawas paingon sa makina nga magsilbe nga kidney aron makalimpyo sa dugo.
Sa sulod sa makina, ang dugo moagi sa nagkadaiyang mga kortina nga maglimpyo sa dugo nga moagi samtang ang dialsysate magsugat sa dugo nga gilimpyohan aron iyang ikalabay, samtang ang nalimpyo nga dugo ibomba og balik pasulod sa lawas.
Pinaagi sa napadak-an nga benepisyo sa Hemodialysis, ang PhilHealth magpadayon pa nga motanyag sa mas gikinahanglan nga suporta sa mga pasyente nga nanginahanglan og dialysis, aron magaan-gaan ang ilang suliran ug mas mapasayon pa ang ilang pag-akses sa uban pang gikinahanglan nga healthcare. (RAHC/PIA Bohol)
