NABUNTURAN, Davao de Oro, January 3 (PIA) — Sa pagpadayon sa pagpalapad sa mga benepisyo alang sa panlawas, gipatas-an sa Philippine Health Insurance Corporation (PhilHealth) ang pinansyal nga tabang alang sa Ischemic Heart Disease-Acute Myocardial Infarction (IHD-AMI) o ‘heart attack’ alang sa tanang ma-admit sa ospital.
Subay sa PhilHealth Circular No. 2024-003 nga ni-epekto atong Disyembre 21, 2024, gipatas-an ang benepisyo sa Percutaneous Coronary Intervention (PCI) gikan sa P 30,300 ngadto sa P 524,000 o sobra 1,000 porsyente nga pagsaka;
Gidugangan sab sa PhilHealth ang benepisyo alang sa Fibrinolysis gikan sa P 30,290 ngadto na sa P133,500 o 900 porsyento nga usban, ug ang Emergency Medical Services uban sa Coordinated Referral and Interfacility Transfer, gipatas-an sab ngadto sa P 21,900, samtang ang Cardiac Rehabilitation after PCI mikabat na og P 66,140.
Sa maong circular, matod sa PhilHealth nga ang maong mga benepisyo alang sa ‘heart attack’ mag siguro nga makadawat ang mga pasyente og hinanali nga pagtambal apil na ang pagbalhin niini sa tukma nga pasilidad ug tanan nga medikal nga interbensyon aron masiguro sab nga mabuhi pa ang pasyente, ug uban pang maayong resultang medikal.
“We understand the significant financial burden that heart disease can place on families (Nasabtan namo ang kadako sa pinansyal nga gibug-aton nga pas-anun sa pamilya),” matod ni PhilHealth President ug Chief Executive Officer Emmanuel R. Ledesma, Jr.
“We have listened to the patients and their families, and with the cooperation of our partner health facilities, we have been able to determine the prevailing costs that led us to adjust and substantially increase our financial support in these life-saving treatments.”
(Naminaw kami sa mga pasyente ug sa ilang mga pamilya, og uban sa atong mga partner nga health facilities, among nasayran ang tukmang galastuhan nga naggiya kanamo nga isibo ug patas-an ug dako ang pinansyal nga suporta niining pamaagi sa pagtambal alang sa pagsalbar sa kinabuhi),” dugang niya.
Ang gipalapdan nga benepisyo musuporta sa usa ka komprehensibo nga serbisyo apil na hinanaling serbisyo medikal, medisina, laboratory ug uban pang diagnostic test, suplay pangmedikal, mga ekwipo, ug mga bayronon nga may kalabutan sa sakit sa kasingkasing.
Sa kaso sa percutaneous coronary intervention (PCI), mahimong makakuha niini bisan asa sa 70 ka mga akreditado nga Cath Labs (catheterization laboratory) sa tibuok nasud.
Gipahinumduman sab sa nangulo sa PhilHealth ang mga miyembro nga walay ‘copayment’ o bayronon alang sa mga na-admit sa ‘basic o ward’ sa parehong publiko o pribadong ospital.
“But we should not forget, heart ailments can be prevented. (Apan dili nato kalimantan nga ang sakit sa kasingkasing mahimong malikayan),” matod ni Ledesma.
Giawhag sab niya ang mga miyembro nga mopahimulos na sa ilang mga ‘primary care benefits’ ubos sa Konsulta aron nga masayo ang pagdiskobre sa sakit ilabi na sa kasingkasing.
“Through the Konsulta, we can identify potential health risks early on, including family history of heart disease, allowing for timely interventions such as medication for cholesterol management and lifestyle advice, to prevent or mitigate the development of heart disease,” dugang ni Ledesma
(Pinaagi sa Konsulta, masayran nato ang mga potential nga risgo sa sayong panahon, lakip na ang family history sa sakit sa kasingkasing. Makahatag kini og sibo nga interbensyon sama sa pag-manage sa cholesterol ug paghatag og lifestyle nga katalambagan, aron mapugngan ang pag-develop sa sakit sa kasingkasing).”
Gidasig sab niya ang mga Pilipino nga magparehistro sa gusto nila nga Konsulta provider sa pinakaduol nga PhilHealth office o pinaagi sa ilang account sa PhilHealth Member Portal. (PIA Davao Oriental/MLU)
