Philippine Army 3ID ginpakigbahin mga binuhatan sa paglab-ot sang kahilwayan sa rehiyon para sa tuig 2024

SYUDAD SANG ILOILO (PIA) — Ginpakigbahin ni Major General Marion R. Sison, Commander sang 3rd Infantry (Spearhead) Division sang Philippine Army kag Joint Task Force Spear, ang ila mga binuhatan sa paglab-ot sang kahilwayan sa rehiyon sa ginpatigayon nga 4th Quarter Campaign Progress Review and Assessment (CPRA) para sa calendar year 2024.

Ang aktibidad, nga ginhiwat sang Disyembre 17, 2024 sa Sandiwa Event Center, ginhatagan importansya ang mga dalagko nga binuhatan sang 3ID sa paglab-ot sang kalinong para sa ika-umwad sang Western kag Central Visayas.

Nagtililipon sa CPRA ang brigade kag battalion commanders kag officers humalin sa nanari-sari nga JTF Spear units. Ini nagserbe man nga pamaagi para mabalikan ang mga kadalag-an, masabat ang mga paghangkat, kag magdihon sang mga istratehiya  para sa mga masunod nga operasyon, lakip na ang mga nalab-ot humalin Oktubre tubtob Disyembre 2024.

Base sa datos sang Philippine Army,  sang 2024, ang JTF Spear nakalab-ot sang operational success nga 63 encounters, kalakip diri ang 11 ka mayor nga engagements kag 48 ka minor results. Ang ini nga mga engkwentro nagresulta sa nutralisasyon sang 116 ka Communist NPA terrorists (CNTs) lakip na ang top leaders kag high-value individuals. Sa mga nanutralisar nga CNTs, 47 ang napatay, samtang 69 naman ang nag-surrender ukon nadakpan. Dugang pa, may 145 ka high- kag low-powered nga armas-luthang ang nakumpiska.

Si Major General Marion R. Sison, Commander sang 3rd Infantry (Spearhead) Division sang Philippine Army kag Joint Task Force Spear, ang nagpakigbahin sang ila mga binuhatan sa paglab-ot sang kahilwayan sa ginpatigayon nga 4th Quarter Campaign Progress Review and Assessment (CPRA) para sa calendar year 2024. (Philippine Army Spearhead Troopers Facebook page)

Ang mga operasyon sang JTF Spear ginpaluya man ang mga terrorist organization sa duha ka rehiyon paagi sa pagbungkag sang tatlo ka guerrilla fronts (GFs), duha ka sub-regional committees, kag duha ka vertical units. Dugang pa, ginpabaskog ang pagtapna sang suporta sa urban support network sa CTG kung sa diin nagresulta sa 26 ka Communist-Affiliated Mass Organizations (CAMOs) nga gin-redirect, apat ka sectoral Front Organizations nga gindula sa listahan, kag isa ka SFO nga ginkonsiderar “ineffective.”

Ang counter-insurgency efforts sang 3ID nagresulta naman sa deklarasyon sang Negros Occidental, Negros Oriental, kag Antique bilang Stable Internal Peace and Security (SIPs) areas. Ang ini nga mga kadalag-an naghatag sa 3ID sang Gawad Parangal plaque halin sa NTF-ELCAC.

Sa ginpatigayon nga CPRA, nakabaton sang pasidungog ang 47th Infantry (Katapatan) Battalion para sa ila Nobyembre 21, 2024 nga engagement sa Brgy. Gatuslao, Candoni, Negros Occidental, kon sa diin ila nanutralisar ang pito ka NPA remnants kag nakumpiska ang 13 ka armas-luthang.

Sa iya pangtakop nga mensahe, ginpunto ni Sison ang importansya sa pagkilala sang mga kadalag-an  kag binuhatan sang grupo. Iya man gina-antisipar  ang kampanya sang Armed Forces of the Philippines nga maga-untat na ang Internal Security Operations, kon sa diin ginahatag niya ang iya salig sa padayon nga kadalag-an sang JTF-Spear.

 “We have to prepare for the campaign of the AFP to end Internal Security Operations. We have accomplished our mission, and of course, without the Team Spearhead, we couldn’t achieve our victory. I congratulate every member of the Joint Task Force Spear for an excellent accomplishment in the year 2024,” siling ni Sison. (AAL/AGP/PIA 6 kalakip ang mga balita halin sa Philippine Army Spearhead Troopers)

In other News
Skip to content