BACOLOD CITY (PIA) — Nagpagwa sang abiso sang Disyembre 18 ang Philippine Institute of Volcanology and Seismology (Phivolcs) batok sa posible nga lahar flow bangod sa madamol nga pag-ulan tuga sang Bagyong Querubin.
Suno sa Philippine Atmospheric, Geophysical, and Astronomical Services Administration (PAGASA), ang interaksyon sang Shear Line kag Bagyong Querubin ginapaabot nga magadala sang mabaskog nga ulan sa Western Visayas kag Negros Island Region (NIR).
Ini nga pag-ulan ang kinahanglan gid bantayan sang mga otoridad kag publiko bangod ini pwede magtuga sang lahar flow ukon malutak nga ilig sang tubig sa mga manaba nga lugar sa palibot sang Kanlaon.
Suno sa Phivolcs, ang tayuyon kag mabaskog nga pag-ulan ang maga-tuga sang lahar flow halin sa nabilin nga pyroclastic density currents (PDC), ukon materyales halin sa bulkan kaangay sang abo kag bato, nga ginpaguwa sang Kanlaon sang paglupok sini sang Disyembre 9.
Pila sa mga lugar nga ginapangandaman batok sa lahar flow amo ang Tamburong Creek sa Biak-na-Bato, Baji-Baji Falls, kag Talaptapan Creek sa Cabacungan, La Castellana.
Nagapadayon naman ang hugot nga pagbantay sang Phivolcs sa aktibidad sang Kanlaon kag paghatag sang kinahanglan nga impormasyon sa publiko. (AGP/BPS/PIA Negros Occidental/Office of Civil Defense)
