BACOLOD CITY (PIA) — Masobra 50 ka mga katapo sang media kag government information officers (IOs) gikan sa nagkalain-lain nga parte sang Negros Occidental ang nagtambong sa seminar nahanungod sa pagpahangop sa publiko sang mga risgo sang Bulkan Kanlaon.
Ang ini nga seminar nga ginpangunahan sang Philippine Institute of Volcanology and Seismology (Phivolcs) ang ginpreparar para sa mga media practitioners kag government information officers gikan sa national government agencies kag mga lokal nga panguluhan malapit sa bulkan.
“Bangod sa pagpamahog sang Bulkan Kanlaon sa mga probinsiya sang Negros Occidental kag Negros Oriental, kinahanglan nga pareho mahangpan sang mga awtoridad kag publiko ang mga risgo kag ang mga dapat ubrahon sa tion sang paglupok sang bulkan,” siling ni DOST-Phivolcs Director Teresito C. Bacolcol.
Tuyo sang seminar nga klaruhon ang kinaandan na nga mga terminolohiya, ipaalinton ang mga nagkalain-lain nga volcanic hazards kag eruption scenarios, kag maghatag sang pagsulundan sa maayo nga pagpanghanda kag pagresponder sa tion sang emerhensya.
Sa pagkilala sa papel sang media kag government information officers sa pagpalab-ot sang importante nga mga impormasyon antes, sa tion, kag pagkatapos sang isa ka kalamidad ukon emerhensya, ang Phivolcs nagatinguha sa pagsiguro nga insakto ang impormasyon nga ginahatag sa publiko.
Gintawag nga “Phivolcs InfoPress: Understanding and Communicating Kanlaon Volcano Hazards and DOST-Phivolcs Information Products,” ang ini nga aktibidad nagatinguha nga mabuligan ang mga pumuluyo sang Negros Island Region (NIR) nga mahangpan ang impormasyon parte sa bulkan sa bulig sang media kag government information officers.
“Paagi sa paghatag sa public information officers kag media sang ila kinahanglan sa mas epektibo nga komunikasyon, makabulig kita sa pagsiguro nga ang mga mensahe nahanungod sa mga risgo sang bulkan, pati man ang safety measures, ang klaro, tayuyon, kag mahapos maintindihan sang publiko,” dugang pa ni Bacolcol.
Kabahin man sang nasambit nga seminar ang #MagingMapanuri campaign sang Philippine Information Agency (PIA) nga tuyo tapnaon ang paglapta sang indi matuod ukon beripikado nga impormasyon, ilabi na tuhoy sa aktibidad sang Bulkan Kanlaon.
Padayon man ang Phivolcs sa pagpakig-angot sa nagkalain-lain nga mga opisina kag ahensya sang gobyerno, kaangay sang Department of Science and Technology (DOST), Department of the Interior and Local Government (DILG), Office of Civil Defense (OCD), PIA, kag Provincial Government of Negros Occidental, sa pagpabaskog sang science kag risk communication para mas mapasanyog ang risk mitigation kag disaster resilience sa mga Negrense.
Ginhiwat ang seminar sadtong Pebrero 19 sa Social Hall sang Negros Occidental Provincial Capitol sa syudad sang Bacolod. (AGP/BPS/PIA Negros Occidental)
