MISAMIS ORIENTAL (PIA) – Napulog usa ka tulonghaan sa lalawigan ang gitunolan sa Provincial Health Office (PHO) sa Misamis Oriental ug insecticide-treated nets. Ang nahisgutang mga nets kabahin sa kampanya kontra sa sakit nga dengue.
Ang mga nakadawat nga eskwelahan gilangkuban sa Bauk-bauk Elementary School, Lapinig Elementary School ug Kabulakan Elementary School sa Balingoan; Kirahon Elementary School, Tambal Elementary School ug San Martin Integrated School sa Villanueva; Lanao Elementary School ug Molocboloc Elementary School sa Alubijid; ug, Kabulawan Elementary School, Lumbo Elementary School ug Central School sa Lagonglong.
Matod sa PHO, tinguha niini nga maprotektahan ang mga magtutungha ug mga personahe sa eskwelahan nga malikay sa sakit nga Dengue.
Gibana-bana sa PHO nga kapin singko mil (5000) ka magtutungha ug syento sitentay tres (173) ka staff sa mga eskwelahan ang maprotektahan sa maong net.
Nagpahinumdom usab ang PHO sa personahe sa mga skwelahan, rural health unit (RHU), barangay officials ug barangay health workers, bahin sa paglikay sa sakit nga dengue pina-agi sa 4S Kontra Dengue.
Ang 4S Kontra Dengue gilangkoban sa, Search and Destroy, Self-Protection Measures, Say Yes to Fogging, ug Seek Early Consultation.
Kauban sa PHO ang Center for Health and Development–Northern Mindanao sa pag kontra batok dengue ning lalawigan.
Kabahin kini sa PAGLAUM strategic direction ni Governor Peter “Sr. Pedro” Unabia ubos sa letrang U kon Unified Efforts for Health and Social Services Delivery. (MisOr Provincial Information Office/PIA-10/Misamis Oriental)
