SYUDAD SANG ILOILO (PIA) – Ginkilala ang mga information offices sang Iloilo City government, Iloilo Provincial government, kag Guimaras Provincial government bilang Best Performing Information Offices sa Kabisay-an Nakatungdan sa ginhiwat nga Western Visayas Information Officers’ Regional Summit sang Philippine Information Agency (PIA) – 6 sang Disyembre 12, 2024.
Ang kahiwatan, sa pakig-upod sang Philippine Statistics Authority (PSA)-6, naghatag sang komendasyon sa Iloilo City Information Office (CIO) sa tayuyon, epektibo, kag komitido nga pagserbisyo sa publiko paagi sa mga programa sa impormasyon, edukasyon, kag komunikasyon.
Magluwas sa pasidungog Best Performing Information Office, ginkilala man sang PIA-6 ang information officer sang Iloilo City nga si Jeehan Fernandez bilang isa sa Best Performing Information Officers subong nga tuig; samtang ang ila Facebook page nakakuha sang pinakamataas nga pwesto sa kategorya sang Best Facebook Page; kag ang newsletter sang syudad nga “Kauswagan” nalakip sa Hall of Fame awardees.
Ginhatagan man ang Iloilo Provincial Information and Community Affairs Office (PICAO) sang pasidungog bilang isa sa Best Performing Information Offices sini nga tuig tungod sa pagtinguha sini sa pag-mobilize sang mga stakeholders sa pagsabat sa ila mga kinahanglanon sa impormasyon, nga nagaamot sa kabilugan nga pag-uswag sang probinsya.
Sa pihak nga bahin, nabaton naman sang Guimaras Provincial government ang pagkilala bilang Best Performing Information Office kaupod ang Best Performing Information Officer award para sa ila information officer nga si Leizl Galan-Gatinao nga gin-induct man sa Hall of Fame.
Samtang, ginkilala ni PIA director general Katherine Chloe S. De Castro, sa iya video message, ang dedikasyon sang information officers sa paghatag sang matuod, husto, kag nagakaigo nga impormasyon, nga nakahatag sang manami epekto sa mga komunidad.
“We are not just messengers; we are champions of development and catalysts of positive change in the grassroots. Through your efforts, government programs and services reach places, touching lives and uplifting communities,” siling ni De Castro.
Ginpahayag naman ni PIA assistant director general (ADG) for organizational development, international affairs, and quality management Atty. Tadeo Culla, nga ang information officers ang nagaserbe nga taytay nga nagakonektar sa gobyerno sa mga pumuluyo.
“In a rapidly evolving digital landscape, our roles are more crucial than ever. We are tasked with ensuring that accurate and timely information reaches our constituents, empowering them to engage in governance and decision-making processes,” dugang pa ni Culla. (AAL/JNH/PIA Iloilo)
