ROXAS CITY, Capiz (PIA) — Isa ka bulan antes mag-abot ang “ber” months nga nagapahayag sang pagsugod sang Kapaskwahan, ang Philippine Information Agency (PIA) Capiz Information Center (Capiz Infocen) kag ang Capiz Association of Government Public Information Officers (CAGPIO) nagpanghatag sang mga bag kag iban pa nga school supplies sa banwa sang Jamindan.
Masobra 154 ka mga kabataan sa Daycare kag Primary School halin sa mga barangay sang Caridad, Fe, Lapaz, kag Sto. Rosario ang handa na para sa school year 2024 tubtob 2025 matapos nila nabaton ang ila bag kag mga school supplies halin sa PIA kag CAGPIO.
Si April Llait, isa ka iloy nga may tatlo ka kabataan halin sa Brgy. Caridad, nagpaabot sang iya pagpasalamat sa PIA kag CAGPIO para sa mga school supply sang duha sa iya mga kabataan kag sa pagdala sang nagkalain-lain nga ahensya sang gobyerno sa ila barangay.
“Bisan pa nga nakabakal na kami sang mga school supplies para sa amon mga kabataan, kulang sa gihapon. Amo nga nagapasalamat gid ako sa PIA kag CAGPIO sa pagbisita sa amon, kay sa subong indi na ako kinahanglan magproblema pa,” pahayag ni Llait.
Ang tagsa ka bata sa Daycare ang nakabaton sang isa ka coloring book, mga lapis, krayola, papel, kag sharpener; ang mga Grade 1 kag 2 nakabaton sang lima ka notebook, papel, kag mga lapis; ang mga Grade 3 nakabaton sang lima ka notebook, papel, mga lapis, kag ballpen; ang Grade 4 nakabaton sang pito ka notebook, papel, mga ballpen, ruler, glue; kag ang Grade 5 nakabaton sang walo ka notebook, papel, mga ballpen, kag protractor.
Ang paghatag sang mga school supplies amo ang pinakahighlight sang Hinun-anon sa Barangay nga ginpatigayon sa covered gymnasium sang Brgy. Caridad sang Agosto 9, 2024.
Ginpahayag ni PIA-Capiz Infocen manager Alex Lumaque nga ang Hinun-anon sa Barangay ang isa ka pamaagi nga mahatagan sang impormasyon ang mga pumuluyo sa kabaranggayan parte sa mga programa sang nagkalain-lain nga ahensya sang lokal kag nasyonal nga gobyerno. (AGP/PLF/PIA Capiz)
