Laragway: Philippine Army Spearhead Troopers
SYUDAD SANG ILOILO (PIA) – Nakabaton sang pagkilala ang 3rd Infantry (Spearhead) Division (3ID) sang Philippine Army gikan sa Police Regional Office (PRO) 6 para sa nangin importante sini nga papel sa pagmintinar sang kalinong kag kahilwayan sa bag-o lang tapos nga 2025 Midterm National and Local Elections.
Ang pagkilala ginhatag sa ti-on sang flag ceremony nga ginhiwat sang Mayo 19, 2025, sa PRO6 Multi-Purpose Hall, Camp Gen. Martin Teofilo B. Delgado, syudad sang Iloilo.
Ginbaton ni Brigadier General Nhel Richard Patricio, Commander sang 301st Infantry Brigade, ang padya para sa bug-os nga 3ID, samtang iya ginkilala ang komendasyon bilang pamatuod sa pangako sang dibisyon sa pagsiguro sang integridad sang eleksyon kag kaluwasan sang publiko.
Samtang, si Major General Michael G. Samson, Commander sang 3ID, nagpalab-ot sang iya pagpasalamat sa PRO 6 sa pagkilala, kag liwat ginpat-od ang dedikasyon sang dibisyon sa pagsakdag sang kalinong kag seguridad para sa mga palaabuton pa nga pagpinili-ay.
“This recognition underscores the strong partnership between the Philippine Army and the Philippine National Police in preserving democratic integrity and ensuring safe elections for the people. We extend our sincere appreciation to PRO 6 for this honor and assure our continued commitment to work hand in hand with the PNP, our security partners, and the communities of Western and Central Visayas, as well as the Negros Island Region, to maintain peace, security, and stability in all future electoral exercises,” siling ni Samson.
Gani, nagapanawan ang 3ID Commander sa tanan nga mga tagsakdag, lakip na ang mga ahensya sang gobyerno, mga awtoridad, kag bug-os nga komunidad nga padayunon ang kooperasyon kag pagbantay sa demokratiko nga mga proseso.
“Together, through unity and shared responsibility, we can ensure that future elections remain peaceful, secure, and truly representative of the people’s will,” dugang pa ni Samson. (AAL/AGP/PIA 6 kalakip ang mga balita gikan sa Philippine Army Spearhead Troopers)
