SYUDAD SANG ILOILO (PIA) – Ginhiwat ang pinakauna nga scientific conference para sa mga lokal nga mangingisda nga gintawag “First Philippines Small-scale Fisheries National Symposium” sa University of the Philippines Visayas (UPV) Auditorium sa syudad sang Iloilo.
Nagbinuligay ang Too-Big-To-Ignore (TBTI) Philippines, UPV, Bureau of Fisheries and Aquatic Resources, kag iban pa nga development partners kag state universities and colleges (SUCs) sa pagpatigayon sang aktibidad.
Ginatos ka mga fisheries experts, fisherfolk leaders, policymakers, kag advocates sa bug-os nga pungsod ang natililipon sa nasambit nga symposium para makigbahin sang ila mga eksperyensya, best practices, kag iban pa nga mga ginakabalak-an nga isyu nga nakasentro sa sustainability, community resilience, kag equitable resource management.
Ginpunto ni Department of Agriculture Undersecretary lawyer Asis G. Perez ang kabaskog kag dedikasyon sang mga mangunguma kag mangingisda, gani siya naghingyo sa ila nga indi lang pagtan-awon ang ila mga kaugalingon bilang mga benepisyaryo kundi bilang mga mapisan nga indibidwal nga nagakabagay hatagan respeto.
“Trust in our sector—our fisherfolk are resilient and strong. All they need is respect,” siling ni Perez.
Samtang naghatag man sang mensahe si BFAR OIC-Assistant Director Angel Encarnacion sa ngalan ni BFAR Officer-in-Charge Isidro M. Velayo kon sa diin ginhatagan niya importansya ang National Plan of Action for Small-Scale Fisheries nga nagasakop sa critical areas kaangay sang governance, value chain improvements, gender equality, disaster risk reduction, climate change adaptation, kag social development.
Ginsambit man ni Encarnacion ang mga ongoing projects kaangay sang Lambaklad Project kag Bantay Dagat Insurance Program bilang mga importante gid nga mga inisyatibo sa pag-improba sang sustainability kag proteksyon sang komunidad.
Sa pihak nga bahin, sa iya keynote speech, nagpabutyag si Roberto “Ka Dodoy” Ballon nga isa ka municipal fisherfolk kag Ramon Magsaysay awardee sang iya paglaum para sa bugana kag sustainable nga fisheries sector kadungan sang iya pagkilala sang importansya sang paghiliusa sa bahin sang mga stakeholders.
“Nakikita ko ang mga pamilyang mangingisda na kayang pag-aralin ang kanilang mga anak, kumain ng masustansyang pagkain, at kayang magpatingin sa doktor kapag may sakit,” suno kay Ballon.
Gin-feature man sa symposium ang poster presentations, plenary talks, parallel sessions, kag marketplace nga naghatag kahigayunan para sa pagbaylo sang mga kaalam kag kolaborasyon. (AAL/AGP/PIA 6 with reports from BFAR 6)
