MALAYBALAY CITY (PIA)— Ang Inspector General sa Philippine National Police Internal Affairs Service (IAS) Atty. Brigido De Jesus Dulay, mibisita sa Bukidnon niadtong Enero 20 aron pasidunggan ang sakripisyo sa lokal nga kapulisan samtang gihatagan ug gibug-aton ang kamahinungdanon sa integridad sa serbisyo.
Sa iyang unang command visit ug inspeksyon sa Camp Captain Ramon Onahon, si Provincial Director Police Colonel Jovit L. Culaway ug ang Bukidnon Police nag-host og usa ka welcome ceremony aron pasidunggan ang PNP IAS Chief gikan sa PNP national headquarters sa Camp Crame, Quezon City.
Gipasidunggan sa mga personahe sa Bukidnon Police Provincial Office (BukPPO) si Dulay pinaagi sa usa ka arrival rite didto sa grandstand sa kampo, nga nagpakita sa ilang panaghiusa ug kaandam alang sa inspeksyon ug audit.
Sa iyang pakigpulong, gipadayag ni Dulay ang iyang tinuoray nga pagpasalamat sa pagmaunongon ug kusog nga paningkamot sa mga pulis sa nasod.
“Nakita nako ang kabug-at sa inyong mga responsibilidad, ang mga sakripisyo nga inyong giatubang, ug ang mga peligro sa matag-adlaw nga serbisyo. Ang inyong trabaho nagkinahanglan og kaisog, kakugi, ug kasingkasing. Tungod niini, gihatagan ko kamo og dakong respeto ug pasalamat. Daghang salamat sa inyong serbisyo ug sakripisyo alang sa nasod,” matod niya.
Gihisgutan ni Dulay ang mga mithi nga kinahanglan ipakita sa matag pulis—integridad, responsibilidad, dedikasyon, ug pagkamatarong—kay kini importante aron makab-ot ang pagsalig sa publiko ug pagsiguro sa kalidad sa serbisyo sa kapulisan.
“Ang pagpulis labaw pa sa usa ka trabaho. Kini usa ka tawag nga adunay pinakataas nga gilauman. Atong tumanon kini alang sa atong kaugalingon, alang sa katawhan nga atong gialagaran, alang sa mga pamilya nga nagsalig kanato, ug alang sa nasod nga atong gisaaran nga protektahan,” pahinumdom ni Dulay sa mga pulis.
Ang maong pagbisita nagtugot sa PNP Bukidnon nga direktang maka-communicate sa IAS Chief, nga naglig-on sa ilang pagkamahinungdanon sa integridad, responsibilidad, ug pagsalig sa katilingban, samtang nagpakita sa paningkamot sa gobyerno sa pagpalambo sa professionalism sa PNP ilawom sa panan-aw nga “Sa Bagong Pilipinas, Ang Gusto ng Pulis Ligtas Ka.” (JMC/PIA 10/Bukidnon)
