Usa na lang ka permit ang kuhaon sa mga tour guides, ug kini para sa ilang organisasyon, samtang alangs a matag usa, ID cards na lang sa tag P50 ang buok aron makasulod sa pantalans a pagkuha sa ilang mga guests, segun sa labing bag-ong kasayuran gikan sa Provincial Tourism Council nga nagkatigum didto Feb 17. (PIA Bohol)
TAGBILARAN CITY, Bohol (PIA) — Sanglit ang mga tour guides gi-isip nga nagtanyag sa dugang serbisyo o ancilliary services diha sa mga pantalan, usa lamang ka permit ang ilang gikinahanglan apan may port access Identification Cards sila nga huptan.
Kini maoy labing ulahi nga kabag-ohan kabahin sa sinabtanay sa mga tour guides sa Bohol ug sa Philippine Ports Authority (PPA) nga gitaho didto sa tigum sa Provincial Tourism Council Meeting Pebrero 17.
Una na nga mingreklamo ang mga tour guide kaniadto tungod kay pangayoan sila og permits sa pagsulod sa pantalan kon mopick-up sa mga turista.
Sa katungod sa PPA, matud pa ila kining gihimo aron makatabang sa pagpugong nga ang mga colorum nga mga tour guides dili na makasulod pagkuha sa mga guests.
Apan alang sa mga rehistrado nga tour guides, dugang kini nga kahasul tungod kay may ID na sila isip tours guides.
Ang pantalan sa Tagbilaran nga gidumala sa PPA, usa sa mga pantalan nga nagsubay sa International Standards of Port Security (ASPS) ilabi na kay kini gianhaan usab sa mga langyaw nga turista.
Nunot niini, aron pagmintinar sa seguridad, giseguro sa PPA nga ang mga nagtanyag sa mga suporta sa pagpadagan sa hapsay nga serbisyo sa pantalan, gihimo sa mga tawo nga gisaligan usab sa PPA.
Subay niini, ang mga tour guides, sama sa mga port drivers nga magkuha sa mga kargamento, isipon sila nga anciliary services providers , ug kinahanglan nga may mopasalig sa personalidad sa mga mosulod sa pantalan nga mga sakop niini.
Dala niini nga sitwasyon, mingsugot na ang PPA nga isip service providers, kinahanglan nga mobayad ang mga tour guides sa usa lamang ka permit alang sa ilang kahugpungan samtang kinahanglang mokuha sa port identification card nga bayaran sa tag P50.00 matag usa.
Kini nga mandu gikan sa PPA Central Office.
Niini, giduso na sa PTC ngadto sa Tour Guides Alliance for Sustainable Bohol, (TOGAS Bohol) nga hiniusang permit fee samtang ang mga guides nga sakop niini, mobayag sa P50 nga identification card nga gamiton samtang anaa sa sulod sa pantalan. (RAHC/PIA Bohol)
