SYUDAD SANG ILOILO (PIA) – Nakaplastar na sang ila mga preparasyon ang pila ka mga ahensya sang gobyerno kag lokal nga panguluhan para sa pagsaulog sang Undas sa Nobyembre 1-2, 2024.
Sa isa ka press conference nga ginhiwat sang Department of Trade and Industry (DTI) – 6 sang Oktubre 30, 2024, ginpahayag ni regional director Rachel Nofable nga nakahiwat na ang ahensya sang price monitoring sa mga merkado sa rehiyon.
“This highlights our ongoing efforts to keep essential items accessible and will have fair price for our consumers, not just for Undas but also in line with our celebration of the Consumer Month,” Nofable said.
Ginpahayag man ni DTI-6 Consumer Protection Division officer-in-charge Atty. Jazer P. Miranda nga wala sila sang may nakit-an nga kakulangan sa supply kag overpricing sang mga essential items para sa Undas, kaangay sang kandila, bottled water, kag mga bulak.
Ginklaro man sang DTI-6 nga wala ginakilala ang bulak bilang isa sa panguna nga mga kinahanglanon ukon balaklon, apang ginakabig ini nga “special product” nga ila man ginabantayan ang presyo sa pili nga mga okasyon, kaangay subong nga Undas.
Sa pag-usisa sang ahensya, kalabanan sa suplay sang bulak sa rehiyon ang naghalin sa Baguio, Dangwa, kag sa pungsod China.
Samtang, sa bahin naman sang Police Regional Office (PRO) – 6, kapin 1,900 ka mga police personnel ang ila iga-deploy sa bilog nga rehiyon bilang kabahin sang paghatag seguridad sa pag-obserbar sang All Saints’ kag All Souls’ Day sining Nobyembre 1 kag 2.
Sakop sang deployment ang mga sementeryo, terminal sang transportasyon, pantalan kag iban pa nga lugar nga mahimo tipunan. Magatukod man ang Philippine National Police sang mga police assistance desk sa sini nga mga lugar agud mapat-ud ang kaluwasan kag seguridad sang tanan sa tion sang selebrasyon.
“In our security coverage, we will closely coordinate and collaborate with the local government units, other law enforcement agencies, force multipliers and Advocacy Support Group will also be tapped to assist in the operation,” pahayag ni PRO 6 Director Brigadier General Jack L Wanky.
Sa pihak nga bahin, handa naman ang syudad sang Iloilo para sa Undas 2024 kung sa diin nakahiwat na ang lokal nga panguluhan sang coordination meeting sa mga makabig frontline offices sa syudad para masiguro ang seguridad sang publiko.
Bilang kabahin sang plano ,natalana nga maga-mobilize sang 180 ka personnel ang Public Order and Safety Management Office (POSMO) nga ginapamunuan ni Jay Victor Mabilog.
Ini ang ginalakipan sang 14 gikan sa Rapid Response Unit, 55 gikan sa Anti-Squatting and Illegal Structure Unit, kag 111 gikan sa Special Services Division. Ang ila mga operasyon pagasuportahan sang isa ka mini dump truck, duha ka L300 nga salakyan, isa ka patrol vehicle, kag isa ka wrecker.
Maaga man nga maga-deploy sang personnel ang Traffic and Transportation Management Office (TTMO) agud ma-manage trapiko kag ang pagdagsa sang mga nagabaligya kag bakal sang bulak sa mga designated areas.
May ara man sang medical teams nga pagabutang ang City Health Office para sa mga magakinahanglan sang bulig sa ikaayong lawas; samtang ang General Service Office naman ang maga-deploy sang apat ka dump trucks, duwa ka mini dump trucks kag isa ka Hilux vehicle para masiguro nga matinlo ang palibot. (AAL/JNH/PIA Iloilo)
