BACOLOD CITY (PIA) — Sa iya mensahe sa mga pumuluyo nga apektado sang paglupok sang Bulkan Kanlaon sang nagligad gid lang, ginsiguro ni Presidente Ferdinand R. Marcos Jr. ang dedikasyon sang gobyerno sa paghatag sang nagakaigo nga bulig para sa nagakinahanglan.
Apisar sang mabaskog nga paglupok sang Kanlaon, ginhambal sang Presidente nga mabaskog man ang pag-ulikid kag suporta nga ginahatag sang gobyerno sa mga pumuluyo sini.
“Sa mga kababayan natin na apektado ng pagputok ng Kanlaon, nandito po ang inyong pamahalaan na handang tumulong sa inyo. Kung gaano man katindi ang bangis ng bulkang ito, ganun din ang kalinga na aming ipapaabot,” hambal ni Marcos.
(Sa aton mga kauturan nga apektado sang paglupok sang Kanlaon, ari ang inyo nga gobyerno nga handa magbulig sa inyo. Kung ano ka baskog ang Kanlaon, amo man ina kabaskog ang pag-ulikid nga amon ipabatyag sa inyo.)
Iya man ginhatagan igtalopangod ang nagapadayon nga koordinasyon sang mga ahensya sang gobyerno naysonal kag lokal nga panguluhan sa pagsiguro sang kahilwayan sang ila mga nasakupan. Masobra 45,000 ka mga indibidwal ang na-evacuate na halin sa 6-kilometer danger zone, samtang tinutuyo naman nga masaylo sa mas hilway nga lugar ang kabug-usan nga 84,000 ka mga pumuluyo.
Sa bahin sang Department of Social Welfare and Development (DSWD), ila ginasiguro nga bastante ang family food packs, non-food items, tinlo nga tubig, kag hygiene kits sa mga evacuation center. Dugang pa, ginmandu-an ni Presidente Marcos ang Department of Budget and Management (DBM) nga mag-release sang budget para sa mga apektado sang kalamidad.
Samtang, naka-high alert man ang Department of Health (DOH) batok sa mga sakit nga tuga sang volcanic ash. Ang National Disaster Risk Reduction and Management Council (NDRRMC) naman, kaupod ang Task Force Kanlaon, padayon nga naga-preparar sa posible nga paglala pa sang sitwasyon.
Naka-alerto kag on standby naman ang Armed Forces of the Philippines (AFP), Philippine National Police (PNP), kag Bureau of Fire Protection (BFP) sa Negros Island para gilayon nga makaresponde kung kinahanglanon.
Nakahanda man ang DOH nga maghatag sang dugang nga medical services, samtang ang mga dugang nga bulong ang sarang ma-airlift ukon makarga sa eroplano halin sa Manila. Nagpangandam si Presidente Marcos nga ang volcanic ash pwede magtuga sang mga sakit, gani mas ginapabaskog ang surveillance kag monitoring sang mga otoridad.
Bag-o pa man ang paglupok sang bulkan, napreparahan na sang National Disaster Risk Reduction and Management Council (NDRRM) kag Office of Civil Defense (OCD) ang posible nga worst-case scenario nga nagpatigayon sang epektibo nga pag-responder base sa aktbidad sang Kanlaon.
Ginhatagan man importansya sang Presidente ang matuod nga impormayson kag epektibo nga komunikasyon sa oras sang kalamidad. Gani, magapadayon ang Philippine Institute of Volcanology and Seismology sa paghatag sang regular nga abiso tuhoy sa Bulkan Kanlaon.
Gin-agda ni Presidente Marcos ang tanan, ilabi na ang mga nagapangduha-duha nga mag-evacuate, nga magpati sa abiso sang mga otoridad bangud mas importante ang kabuhi kaysa propidad. Iya man ginasiguro sa bilog nga pungsod nga nagapabilin nga dedikado ang gobyerno sa paghatag sang bulig kag suporta sa mga apektado nga komunidad sang sini nga krisis. (AGP/BPS/PIA Negros Occidental/ Office of Civil Defense)
