MAMBAJAO, Camiguin (PIA)--Anaa sa 7,601 nga mga benepisyaryo sa probinsya ang nalakip sa Tulong Panghanapbuhay sa Ating Disadvantaged/Displaced Workers (TUPAD) program sa Department of Labor and Employment (DOLE) ug nabansay sa pag-implementar sa programa sa the Camiguin Provincial Field Office (Cam PFO).
Si DOLE-10 Cam PFO Chief Arlyn Z. Bael miingon nga ang mga benepisyaryo mga residente sa lima ka munisipyo sa probinsya, ug kini sila giingon nga self-employed, underemployed, o seasonal nga mga trabahante kinsang mga kinitian naapektuhan sa COVID-19 nga pandemya.
Matud ni Bael, sa pakigtambayayong sa probinsyal nga pangagamhanan pinaagi ni Gob. Xavier Jesus Romualdo, nagpahigayon og mga orientasyon ang buhatan sa Guinsiliban niadtong Oktubre 11 nga aduna'y 1,048 nga benepisyaryo; Oktubre 12 sa Sagay (879); Oktubre 14 sa Catarman (1,853); Oktubre 15 sa Mahinog (1,323); ug Oktubre 18-19 sa Mambajao (2,498).
Matag benepisyaryo makadawat og P3,900 nga mukabat sa P29,643,900, isip sweldo sa 10 ka adlaw nga pagtrabaho, Oktubre 13-26, 2022, alang sa serbisyo sa komunidad sama sa pagpanilhig sa mga kadalanan sa barangay, vegetation control, ug pagpanghinlo sa ilang palibot aron mapakgang ang pagkuyanap sa COVID-19.
Ang orientasyon suportado usab sa mga mayores sa mga munisipyo ug sa ilang Public Employment Service Office (PESO) managers.
Ang TUPAD usa ka hinabang sa komunidad nga laraw mahatagan og trabaho ang mga displaced workers, underemployed workers, ug seasonal workers sa pinakaubos nga 10 ka adlaw, apan dili mulapas sa 90 ka adlaw, depende sa buhaton nga trabaho. (DOLE-10/PIA-10/Camiguin)
