CAMIGUIN (PIA)--Ang National Book Store, Inc., kaabag ang Department of Science and Technology (DOST) pinaagi sa rehiyonal nga buhatan niini, nanghatag og mga gamit pang-eskwela sa 201 nga estudyane sa Santo Niño Integrated School sa Catarman, dinhi, pinaagi sa Project ARAL (Access to Resources for Alternative Learning).
Agi'g pag-ila sa panginahanglan nga makapalambo og daghan pang hanas nga mga trabahante, si Usec. Sancho A. Mabborang, DOST undersecretary for regional operations ug kasamtangang officer-in-charge sa DOST-10, nakita ang kahigayunan nga makahatag sa mga estudyante og mga gamit pang-eskwela aron mas masilsil ang ilang pagmahal sa pagtuon.
Ang maong mga gamit pang-eskwela gihatag ngadto sa Sto. Niño Integrated School, Nobyembre 17, nga gipangunahan ni Provincial Science and Technology Director Joanne Katherine R. Banaag, sa pakigkoordinar sa probinsyal nga buhatan sa Department of Education (DepEd).
Ang Barangay of Sto. Niño usa sa mga nailang Geographically Isolated Disadvantaged Areas (GIDAs) sa Catarman. Ang maong munisipyo benepisyaryo usab sa uban pang science, technology, ug innovation nga inisyatibo sa DOST-10 ubos sa Community Empowerment through Science and Technology program. (DOST/PIA-10/Camiguin)
