October 31, 2023- Alayon sa Cooperative Month celebration ning tuiga nga nagdala sa tema nga “Cooperatives: Pioneering the Path to Recovery Amidst Modern Challenges of Climate Change and Food Security”, ang kagamhanang lokal sa Dipolog pinaagi sa City Cooperative Development Office ug City Disaster Risk Reduction and Management Office (CDRRMO), ang mipahigayon og pagbansay-bansay sa “Management of Basic Emergencies” kamiaging adlawa, Oktubre 26 ning tuiga.

Si City Cooperative Development Officer, Ms. Elena Doris R. Sarande, kinsa mihatag sa iyang welcome remarks, ang mipasabot sa mga mitambong nga kining nasangpit nga kalihukan ang gipahigayon aron makabaton ang matag usa og kaalam ug edukasyon para maka-preparar sa mga emerhensiya ug katalagman kon ugaling kini mahinagbuan.

Samtang nalipay usab si Mayor Darel Dexter T. Uy tungod kay kining maong pagbansay-bansay, importante kaayo aron makabalo ang usa ka indibidwal sa iyang pagabuhaton kon dunay mga emerhensiya ug mga pagsulay nga mahitabo.

Natuki sa maong kalihukan mao ang Basic First Aid and Hands only CPR, Bandaging Technique ug uban pa pinaagi sa mga lecturers gikan sa CDRRMO.

Lakip sa mitambong niini mao si CDRRM Officer Atty. Arvin L. Bonbon ug mga personahe gikan sa nagkalain-laing kooperatiba ning dakbayan sa Dipolog. (cio-Ltd)