NEGROS OCCIDENTAL (PIA) – Nagtapos na ang ginpatuman nga 60 ka adlaw nga price freeze sadtong Agosto 4 sa banwa sang La Castellana bangud sang epekto sang paglupok sang bulkan nga Kanlaon.
Ginpahayag ni Joy B. Cardinal nga Provincial Director sang Department of Trade and Industry (DTI) – Negros Occidental nga ang Price Act sang pungsod Pilipinas ang naganagapatuman sang price freeze matapos madeklara ang State of Calamity sa isa ka banwa, syudad o probinsya.
Ginpapanaug ang State of Calamity sa banwa sang La Castellana pagkatapos nga linibo ka mga pumoluyo ang naapektuhan sang asupre kag lahar gikan sa bulkan nga Kanlaon nga naglupok sadtong Hunyo 3.
Nahibaluan nga nangin adlaw-adlaw ang pagmonintor sang DTI sa mga nagapanguna nga mga balaklon kaangay sang bugas, mais, itlog, tinapay, utanon, baboy, kape, kalamay, mantika, asin, habon, uling, kandila kag iban pa.
Ang price monitoring ginpatigayon sa mga tiangge kag mga dalagko nga mga balaligyaan agud proteskyonan ang mga pumoluyo batuk sa mga oportunista nga mga negosyante.
“Sa amon nga pagmonitor wala kami natukiban nga mga bayolasyon sa price freeze bangud tanan sila nagsunod sa mga regulasyon sang DTI,” suno okay Cardinal.
Nahibaluan nga nagbalik na sa bulanan ang pagmonitor sa mga presyo sang mga balaklon sa banwa sang La Castellana kag amo ini ang mangin basihan pananglitan maglupok liwat ang bulkan.
Ginhingyo ni Cardinal ang mga bumalakal nga magpangita sang barato kag dekalidad nga mga produkto antes mag bakal, lantawon pirmi ang expiry date kag maglantaw kon may promo nga nagatanyag sang mas barato pa gid nga presyo. (AAL/Lljr/ PIA6 Negros Occidental)
