SYUDAD SANG ILOILO (PIA) – Pormal na nga ginpaidalom sa state of calamity ang bilog nga probinsya sang Iloilo bangud sa nagapadayon nga pagtaas sang kaso sang dengue sa komunidad.
Gin-aprubahan sang Sangguniang Panlalawigan (SP) ang deklarasyon sang state of calamity kag paghatag sang calamity fund nga P13.6 milyones matapos ini gin-rekomendar sang Iloilo Provincial Disaster Risk Reduction and Management Council (PDRRMC) sa ila pagsinapol sang Agosto 20, 2024.
Ang pundo ang gamiton sa pagbakal sang IV fluids para sa district hospitals (P3 milyones); pagbakal sang knapsack sprayers nga igahatag sa 43 ka local government units (P5.6 milyones); pagbakal sang dengue test kits (P2 milyones); kag pagbakal sang dugang pa nga chemicals para sa spraying (P3 milyones).
Samtang sa isa ka media interview, ginpahayag naman ni Cornelio Salinas nga hepe sang PDRRMO nga gin-rekomendar sang PDRRMC ang calamity status bangud nalab-ot na sang probinsya ang pagsulundan sang National DRRMC kon sa diin isa diri amu ang may ara na sang duha ukon mas madamo pa nga kabanwahanan ang apektado sang problema.
Sa karon, ang mga lokal nga panguluhan sang Miag-ao, Tigbauan, Oton kag Passi City sa probinsya ang nakadeklarar na sang state of calamity sa munisipal nga lebel.
Samtang ang banwa sang Badiangan naman ang nagdeklarar sang outbreak bangud sa mataas nga kaso sang dengue.
Sa datos sang Iloilo Provincial Health Office (PHO), may ara na sang 4,595 ka kaso sang dengue ang probinsya humalin sang Enero 1 tubtob Agosto 10, 2024, kung sa diin 11 na ang napatay. Ang kaso ang mas mataas man sang 320 ka porsiyento kon ikumpara sa 1,095 ka kaso sang 2023.
Nagpahanumdom naman si PHO head Dr. Maria Socorro Colmenares-Quiñon sa publiko nga mangin mabinantayon sa ila palibot kag proteksyonan ang ila mga kaugalingon kontra sa dengue.
“Our concern does not involve health alone, but it has to be a whole-of-society approach to stop dengue because of the risk. Cases continue to rise. More cases of dengue, the higher the risk of more deaths,” pahayag ni Quiñon.
Samtang nagpangabay naman si Gov. Arthur Defensor Jr. sa publiko nga gilayon nga magpakonsulta kung may ara na sang sintomas sang dengue; kag ginhingyo man ang publiko nga gamiton ang 4S strategy.
“We have been monitoring and already started the implementation of the 4S strategy (Search and Destroy, Secure Self-Protection, Seek Early Consultation, and Say Yes to Fogging) even through our Limpyo Iloilo campaign. We have also prepared the province in the areas of dengue test kits, IV fluids and bed capacities of hospitals,” siling ni Defensor.
Nagpaguwa man sang Executive Order No. 174 sang Agosto 15 ang gobernador nga nagatalana sang mga pagsulundan agud mapaayo ang pag-atipan sa mga pasyente kag ma-optimize ang operasyon sang mga pasilidad sa ikaayong lawas subong nga nagadamo ang kaso sang dengue. (AAL/JNH/PIA Iloilo)
