SYUDAD SANG ILOILO (PIA) — Sa ikaduha nga tinion, mangin kabahin ang gobyerno probinsyal sang Iloilo sa pagsaulog sang Independence Day commemorative events sa Rizal Park, Metro Manila sa Hunyo 12, 2025.
Igapasundayag sang probinsya ang Cry of Santa Barbara sa gihapon sa Parada ng Kalayaan Float Competition. Samtang, mangin representante naman ang Tultugan Festival sa bahin sang Performance Competition.
Ang ini nga mga aktibidad ang highlight sa ika-127 nga annibersaryo sang pag-proklamar sang kahilwayan sang Pilipinas.
Nagkalain-lain nga mga local government units kag ahensya nga may yara sang importunate nga bahin sa maragtas tuhoy sa pagtukod sang pagkapungsod sang Pilipinas ang magapartisipar sa float competition. Sa piyak nga bahin, ang performance competition ang magapakita sang kinaiya sang mga LGUs pinaagi sa ila nga mga local festivals.
Madumduman nga ang Cry of Santa Barbara nga natabo sang Nobyembre 17, 1898 ang nagmarka bilang pormal nga inagurasyon sang Federal State of the Visayas kun sa diin si Roque Lopez ang presidente kag si Heneral Martin Delgado ang general-in-chief sang army.
Nangin tagdaog ang probinsya sang Iloilo sang 2024 sa bahin sang float competition sang ginsaulog nga Philippine Independence Day. (AAL/LMLE/PIA Iloilo)
