SYUDAD SANG ILOILO (PIA) — Ginpangunahan sang Regional Nutrition Evaluation Team (RNET) ang paghiwat sang MELLPI PRO ukon Monitoring and Evaluation of the Local Level Plan Implementation Protocol sa tinutuyo nga i-monitor kag usisaon ang pagpatigayon sang programa sa nutrisyon sa probinsya sang Iloilo.
Suno kay Dr. Wendel Marcelo, Provincial Health Officer I kag Provincial Nutrition Action Officer, gin-usisa ang mga nanari-sari nga bahin sang nutrition program sang tuig 2023 kaangay sang nutritional status sang probinsya, Vision-Mission, governance, local nutrition committee management functions, pagpatigayon sang mga layi kag polosiya, kag mga serbisyo nga ginatanyag.
“MELPPI PRO is a document-based evaluation, so we just need to prepare the different documents to support the different elements of the dimensions,” pahayag ni Dr. Marcelo.
Dugang ni Marcelo nga isa sa mga pagpanghangkat sang ini nga ebalwasyon ang paglikom kag pagbutang sang mga hilikuton sa isa ka dokumento nga pagareviewhon sang RNET.
Ginabug-usan ang RNET ni OIC-Regional Nutrition Program Coordinator Sheryl Sedantes, National Food Authority (NFA) Information Officer Lalaine Doronila, Consultant Paula Huelar, kag National Nutrition Council (NNC) Project Development Officer Mari Blithe Soliva.
Sa pihak nga bahin, gin-endorso man sang Provincial Nutrition Evaluation Team banwa sang Lemery, Ajuy, kag Miagao sa RNET para sa ebalwasyon.
Luyag man sang probinsya nga maagom ang Green Banner Seal of Compliance sa ikatatlo nga tinion, lakip man ang pagka-contender bilang Consistent Regional Outstanding Winner in Nutrition (CROWN).
Base sa impormasyon sang RNET, mahimo nga makuha ang CROWN kun ang lokal nga panguluhan, probinsya, ukon syudad makabig nga Green Banner Seal of Compliance awardee sa sulod sang tatlo ka masunod nga tuig kag nagapanguna sa rehiyon nga may MELLPI Pro skor nga 90% ukon mas labaw pa sa ikatalo nga tuig nga gin-evaluate ini sang RNET. (AAL/LMLE/PIA Iloilo)
