SYUDAD SANG ILOILO (PIA) — Ginpangunahan sang Iloilo Provincial Library and Archives ang paglunsar sang digital library kag online resource portals nga makabig nga isa ka milestone kun sa diin ang publiko maka-access sa mga government publications, historical documents, kag iban pa nga pagtulun-an.
Suno sa Capitol press statement, ang kahiwatan nagpakita sang panaad sang probinsya nga sakdagon ang digital transformation sa paghatag sang serbisyo sa publiko, ilabi na sa sektor sang edukasyon kag impormasyon.
Sa iya mensahe, ginpahayag ni Provincial Administrator Raul Banias ang importansya sang accessibility sa digital sa ini nga panahon.
“You don’t have to go to the library, but you can access publications through your gadgets,” suno kay Banias.
Nalakip sa mga ginlunsar nga digital platforms amo ang Library Websites, Digital Library, Virtual Reference Services, kag Bookshare.
Para naman kay Iloilo Provincial Library and Archives chief Allana Delgado, ang pagbalhin sa digital nga aspeto ang nagahatag sang kahigayunan sa library nga mas mapasangkad ang mahimo nga malab-ot sini.
“The library can provide assistance even if the users don’t physically visit the library,” pahayag ni Delgado.
Ginhingyo man ang mga partisipante sa pagscqn sang QR codes agud masugudan ang pagamit sang mga online platforms. (AAL/LMLE/PIA Iloilo)
