Padayon nga ginahiwat it Philippine Statistics Authority (PSA) ro anda nga pagparehistro sa Philippine Identification System (PhilSys) para sa mga inunga nga ga pang-edaron 1 asta 4 dag-on sa probinsya it Aklan.
Suno kay PSA-Aklan Chief Statistical Specialist Antonet B. Catubuan, sa harang Mayo 31, 2024, may kabilugan 11,319 nga mga inunga 1 asta 4 anyos ro nakaparehistro eon sa PhilSys sa probinsya it Aklan.
“Ro PSA-Aklan padayon sa pagtinguha para sa PhilSys registration kapin sa harang pang-edaron dahil base sa 2020 Census of Population and Housing (CPH), raya nagarepresentar eamang sa 24.79 porsyento it 45,661 ka populasyon sa rayang age group. May ina pa nga 75.21 porsyento nga owa pa kaparehistro,” hambae ni Catubuan.
Owa’t eabut sa PhilSys Fixed Registration Center (FRC) nga nahamutang sa Osmeña Avenue, Kalibo, Aklan nga nagabaton it walk-in applicants para sa national ID registration, ro ahensya hay nagahiwat man it mga mobile registration sa nagkaea-in ea-in nga mga kabanwahunan sa Aklan eabi eon gid sa mga maeayu nga lugar para masigurado nga ro kada Aklanon hay nakarehistro eakip ro mga inunga nga nagapang-edaron isaea hasta sa apa-at nga dag-on.
Ro mobile registration service, nga ginatawag nga “PhilSys on Wheels,” nakataeana magtao sa mga Akeanon it hassle-free nga pagparehistro sa National ID ag pag-isyu it ePhilID.
Ro PSA team hay magaagto mismo sa lugar para asistehan ro mga indibidwal sa pagkompleto it andang pagrehistro para siguraduhon nga mangin mayad ag matawhay ro proseso.
Gina-engganyo it PSA-Aklan ro mga ginikanan nga iparehistro ro andang mga unga nga naga edad isaea hasta sa ap-at ag panipuslan ro rayang oportunidad nga ginatao it PhilSys, kapin pa ro andang mobile services dahil kara indi eon kinahangean it mga residente nga magbyahe pa it maeayo para eamang makompleto ro andang PhilSys registration.
Si Elaine T. Majabague, trenta y tres anyos nga Aklanong nanay, naghimueos sa PhilSys on Wheels para iparehistro ro ana nga sang dag-on ag siyam nga buean nga unga, hay ginapanan-aw nga ro National ID registration para sa isaea hasta ap-at dag-on hay manami gid nga programa it gobyerno.
“Bilang ginikanan, nasadyahan gid ako nga ro akon nga unga nga sang dag-on hay may ID ag bukon eang it birth certificate ro amon nga ginapakita. May ana eon kumbaga nga identity ag napabilang na gid imaw sa sosyodad,” hambae ni Majabague.
Kaparehas ni Majabague, si Aina Vias Pastor ginparehistro man ro anang sang dag-on ag waeong buean nga unga sa National ID, ag nasayuran nga maeumo ro proseso it pagparehistro dahil may empleyado halin sa PSA-Aklan nga dayun nagabulig ag nagasuporta.
Para sa pagparehistro it mga inunga isaea hasta ap-at dagon, ginaabisuhan ro mga ginikanan nga sa oras it pagparehistro, daehon andang PhilID o ePhilID, kaibahan ro birth certificate it unga nga gin-isyu it PSA ukon Local Civil Registrar.
Kung sa oras it pagparehistro hay ro guardian ro kaibahan it unga nga gapang-edaron isaea asta ap-at anyos, kinahangean magpakita it authorization letter halin sa ginikinan it unga, bilang dugang nga dokyumento.
Ro demograpikong impormasyon nga ginakolekta sa tyempo it pagparehistro hay ro mga masunod: seks, adlaw it pagkatawo, lugar it pagkatawo, tipo it dugo, ginaistahan, nationality, telepono, ag front-facing nga litrato.
Kung mag-abot ro sa limang dag-on ro unga, saka pa eamang bue-an it kompletong biometric nga impormasyon, kaparehas it fingerprints, iris scan, ag updated nga front-face nga litrato.
Pagkatapos it pagparehistro, paga-isyuhan ro mga inunga it ePhilID ag andang PhilSys Number (PN) hay igakonektar sa PSN it ginikanan ukon manugbantay. (AGP/SQP/PIA Aklan)
