TAGBILARAN CITY, Bohol (PIA) — Sa upat na ka sunod-sunod nga buwan, namatikdan nga menos ang ki-at sa presyo sa mga palitonon, butang nga nakatabang sa mga Bol-anon nga kapus sa pangita.
Subay sa taho sa Philippine Statistics Authority (PSA) sa Pebrero 2025, ang mga Bol-anon nga kabus nakabenepisyo sa -1.03 porsyento nga paglihok sa presyo kon itandi sa 1.0 porsyento nga namatikdan sa milabay nga unang buwan sa tuig.
Kini nga pagkubos sa lihok sa presyo sa mga nag-unang paliton gani, nagsugod og da-us-os niadtong Nobyembre, diha nga gikan sa 6.0 porsyento niadtong Oktubre, mikanaug kini ngadto sa 3.2 porsyento.
Pagka Disyembre, mipadayon og ka maayo ang kinaiya sa presyo diha nga namatikdan nga mi-us-os pa kini sa 1.6 porsyento sa panahon sa tingpasko.
Sa Enero, mas natabangan ang mga kabus sa -1.0 porsyento nga ki-at sa presyo, subay sa taho ni Provincial Statistician Jessamyne Anne Alcazaren, didto sa binuwan nga Inflation Rate data dissemination.
Sa pangutana kon unsa ang naka-ingon sa nalansang nga pagsaka ug gani ang pagkanaug sa presyo sa ubang palitonon?
Matud sa PSA, alang kanila, ang diperensya sa presyo sa pagkaon nga gani mingmaayo pa, gikan sa -3.4 sa Enero ngadto na sa -3.3 sa Pebrero.
Kini bisan pa sa paglihok nag sugod sa presyo sa isda nga sagad monihit na sa panahon sa ting-init.
Karon, kasagarang isda nga makuha, kadto na nga tua sa mga lawom nga lawod nga kinahanglang dinagkong panagat ang gamiton ug mas mahal ang produksyon.
Miduyog usab ang presyo sa prutas, mga lagutmon, saging lung-agon ug batong, apil ang asukar, mga matan-is ug mga panghimagas.
“Kon dili pa lamang sa maayong dagan sa presyo nga gipakita sa bugas, mais, karne ug mga parte sa inihaw nga mga mananap, gatas, itlog ug mga giproseso na pagkaon gawas sa de lata, hayan, mabati na sa kadaghanan ang pagpiit sa presyo,” subay sa gipakita nga monitoring sa PSA. (RAHC/PIA Bohol)
