NEGROS OCCIDENTAL (PIA) – Nagpa-andam sa publiko ang Philippine Statistics Authority (PSA) sa Negros Occidental kaangot sa nagaduging nga mga peke nga national identification card.
Suno kay John F. Campomanes nga Chief Statistical Specialist sang PSA nga ila natukiban ang iligal nga pagkopya sang Digital National ID nga yara sa polyvinyl chloride (PVC) cards kag base sa report, nagdamo na ini sa syudad sang Bacolod kag sa probinsya sang Negros Occidental.
Suno sa iya, ang illegal nga pag-imprinta sang Digital National ID ang istrikto nga ginadumilian kag ang ini nga dokumento ginakabig nga imbalido.
“Ang sin-o man nga maghimo kag magpanagtag sang National ID nga wala sang permiso gikan sa Philipine Statistics Authority ang makaagom sang penalidad nga tatlo tubtob anum ka tuig nga pagkapriso kag penalidad nga P1milyon tubtob P3 ka milyon. May kaparehas man nga penalidad ang madakpan nga iligal nga naga-usar sini nga ID,” pahayag ni Campomanes.
Sa ila sini nga website, nagaapelar ang PSA sa mga talatapan nga i report sa [email protected]; m.me/PSAPhilSysOfficial ukon magtawag sa 1388 kon may ginasuspetsuhan sila nga peke nga national ID.
Ginhingyo ni Campomanes ang bulig sang mga pumoluyo nga i-report sa PSA kon may nahibaluan sila kaangot sa iligal nga naga-himo sang national ID.
Nahibaluan nga ang mga ginabaton nga ID amo lamang ang National ID nga gin screenshot ukon gindownload gikan sa file sang Digital National ID sa papel, ang Physical National ID card nga gin imprinta sang Bangko Sentral sang Pilipinas kag ang gindeliver nga National ID sang Service Delivery Provider.
Sa dugang nga ihibalo gikan sa PSA Negros Occidental, i- follow ang ila opisyal nga Facebook page https://www.facebook.com/psa0645negocc. (AAL/Lljr/PIA6 Negros Occidental)
