Deputy Brigade Commander Col. Manolito F. Montiel kang 301st Brigade, Philippine Army nagkipag-istorya sa mga miyembro kang FRs kang ginhiwat ang peace dialogue sa Barbaza, Antique. (Photo: PIA Antique)
SAN JOSE, Antique (PIA) — Ang Provincial Task Force to End Local Communist Armed Conflict (ELCAC) naghiwat kang sangka “peace dialogue” kaimaw ang anay mga rebelde ukon mga Former Rebels (FRs) sa Barbaza, Antique.
Ang dya nga mga rebelde aktibo katong mga dekada 80 kag 90 nga nagbalik sa sabak kang gobyerno.
Gindayaw ni Mayor Roberto Necor kang Barbaza ang dya nga lihuk agud mapamatian man ang problema kang dya nga sektor.
“Naga pasalamat gid kami sa mga miyembro kang Provincial Task Force ELCAC sa tiempo kag patipon ridya sa amun banwa agad taw-an ka igtalupangud ang ginapangabay kang mga anay FRs,” hambal ni Necor.
May kabilogan nga 16 ka FRs halin sa Barbaza, apat (4) sa Tibiao, anum (6) halin sa Sebaste, kag darwa (2) sa Culasi ang nagtambong kang amo nga hinun-anon.
Suno kay PTF-ELCAC lead convenor Margie L. Gadian ang gobyerno probinsyal kag mga ahensya kang gobyerno handa sa pagbulig para sa anda kaaraydan.
Raku nga mga problema ang anda ginpautwas parehas kang kinahanglanun sa paghanas kag kapital para sa parangabuhian, konsultasyon sa ika-ayong lawas kag iba pa nga kinahanglanun.
Ang mga ahensya kang gobyerno nga miyembro kang PTF ELCAC nagpabutyag man ka anda programa kag serbisyo kag kun paano sanda makabulig sa mga FRs.
Gindayaw man ni Deputy Brigade Commander Col. Manolito F. Montiel kang 301st Brigade kang Philippine Army ang desisyon kang mga FRs nga magbalik sa sabak kang gobyerno para sanda maka-agum kang mayad nga kabuhi.
Samtang ginhambal ni Police Provincial Director Col. Lea Rose B. Peña sa mga FRs nga padayun run nanda nga himuon kun ano ang makapamayad kananda agud tayuyon run ang anda kauswagan.
Ang mga FRs gin-organisar kang PSWDO para mabuligan sanda nga makabaton pa gid kang dugang nga serbisyo kang gobyerno.
Samtang sanda kato nga higayun nagbatun kang hygiene kits halin sa Office of Civil Defense kag food packs halin sa Provincial Government. (AGP/PSM/PIA Antique)
