SYUDAD SANG ILOILO (PIA) — Ginalauman ang mga patient transport vehicles nga ginpanghatag sa mga kaprobinsyahan sa Western Visayas ang pagapadali sang access padulong sa de kalidad nga serbisyo sa medical, bagay nga nagapakita sang prayoridad ni Presidente Ferdinand Marcos Jr. tuhoy sa madasig nga medical intervention sa pagresponde sa tion sang kalamidad kag emerhensiya.
Ginpangunahan ni Presidente Marcos Jr. kag Philippine Charity Sweepstakes Office (PCSO) General Manager Melquiades Robles ang pagpanghatag sang 51 ka mga PTVs sa idalom sang Medical Transport Vehicle (MTV) Donation Program sang PCSO.
Ang ini nga programa ang gindisenyo agud mapasanyog ang healthy equity kag mabuligan ang mga malayo nga komonidad sa ila kinahanglanon sa patag sang serbisyo medikal.
Suno kay Robles, ang PTVs magabulig sa lokal nga gobyerno sa paghatag sang mas madasig, mas epektibo nga serbisyo sa pag-atipan sa ikaayong lawas, nga nagapat-od nga ang tagsa ka Pilipino, bisan diin man ang ila nga lokasyon, ang may access sa nagakadapat nga medical care.
“These PTVs will bridge the gap between life and timely medical intervention, ensuring that no one is left behind,” pahayag ni Robles.
Ginpanginbulahan man ni Robles ang mga lokal nga panguluhan sa ila dedikasyon sa pagserbe sa mga komonidad, ilabi pa nga nangin frontliners ini sang pandemya.
“We will aspire to give two ambulances per municipality before the President’s term will end, ” pakigbahin ni Robles.
Para naman kay Provincial Administrator Raul Banias, iya nga ginkilala ang nagakaigo nga bulig sang mga PTVs sa pagadala sa mga pasyente sa medical facilities sa tion sang emerhensiya.
“Dako nga bagay nga gintagaan sang 18 patient transport vehicles ang province of Iloilo halin sa PCSO because we know and the governor fully understands that ang criticality and cruciality sang time sa pagtransport sang aton pasyente pakadto sa medical facility,” suno kay Banias.
Ginpakigbahin man ni Banias nga ang kutob samga LGUs nga luyag mag-upgrade sang PTVs sa ambulansiya, ang handa nga buligan sang gobyerno probinsyal nga makakuha sang lisensya nga mag-operate sa Department of Health (DOH). (AAL/LMLE/PIA Iloilo)
