TAGBILARAN CITY, Bohol (PIA) — Gisugyot didto sa Sangguniang Panlalawigan Committee of the Whole nga nagkatigum nga maghimo og public forum aron mahibaw-an kon unsay gusto sa mga konsumidor sa Bohol Light Company Inc. (BLCI) ug Bohol Water Utilities Inc. (BWUI): paliton ba og balik, o ipabilin ba ang 30 porsyento nga shares sa kompanya nga iya gihapon sa Kapitolyo.
Kini maoy mingtumaw nga mga sugyot gikan sa mga sakop sa Bohol Governance, Accountability and Review Team (BOGART), kinsa maoy nanghangyo og Sangguniang Panlalawigan special hearing aron timbangon kon unsa na ang nahitabo sa minilyon nga gipapuhunan sa Kapitolyo human mabaligya sa unang mga administrasyon ang Provincial Public Utilities Department (PPUD).
Niadtong nangagi nga administrasyon, nahukman sa Bohol nga ibaligya ang PPUD nga maoy nagpadagan sa serbisyo sa suga ug tubig sa Tagbilaran, tungod sa kawalay kapasidad sa goberno nga mopadagan sa negosyo nga manginahanglan sa dinali-an nga mga solusyon ug dagkong pamuhunan.
Sa kinatibuk-an nga P155M, napalit sa Salcon Power ang PPUD, apan human sa 25 ka tuig nga moexpire ang prangkisa nga iya sa PPUD, kinahanglan na usab nga makadesisyon ang Kapitolyo kabahin sa pag-extend o sa pagpalit og balik sa mga nabaligya nga utilities.
Sa pagkahalin, nagpabilin og 30 porsyento nga bahinan sa shares ang Kapitolyo sa nahalin nga mga utilities, ug kini gitugbangan usab sa Salcon Power sa 70 porsyento.
Sa panahon ni kanhi Goberndor Erico Aumentado, nahukman nga paliton og balik ang shares nga nabaligya, apan, nagasto na ang halin niini ug nanginahanglan nga usab sa komplikado nga mga pamaagi aron mahibalik sa Bohol ang utilities nga nahalin na.
Karon nga anaa na sa panahon nga desisyonan sa Bohol ang pagrenew sa prangkisa sa Salcon nga karon Bohol Light Company Inc. ug Bohol Water Utilities Inc., ug human mingtubo na ngadto sa usa sa mga lig-on nga kompanya sa Bohol, matud sa BOGART nga angayan lamang nga ang mga konsumidor masayud usab sa sitwasyon aron makatabang sa desisyon.
Si provincial administrator Aster Caberte, mipadayag nga magpatawag ang Kapitolyo og Power Forum isip venue nga ang mga konsumidor, mapasayran sa sitwasyon, aron mao nay mohimog desisyon.
Kini nga lakang, nahasubay usab sa gisugyot sa BOGART. (RAHC/PIA Bohol)
