TAGBILARAN CITY, Bohol (PIA) — Nanawagan ang Office of Civil Defense (OCD) sa publiko nga dili pakamenoson ang mga hulga nga gipahinabo sa shear line ug sa intertropical convergence zone (ITCZ), nga padayong nagdala sa mga pag-ulan ug pagkabalda sa panahon sa tibuok nasud.
Ang shear line, usa ka utlanan diin magtagbo ang init ug bugnaw nga hangin, nagmugna og mga panganod sa ulan.
Ang ITCZ, diin ang trade winds gikan sa duha ka hemispheres nagtagbo, hinungdan sa pagsaka sa hangin ug moresulta sa kusog nga ulan.
Kini nga mga sistema nakahatag na og dakong kadaot, partikular na sa Mimaropa, Eastern Visayas ug Davao regions, nga misangpot sa lima ka patay ug duha ka missing nga mga tawo gikan sa Disyembre 26, 2024, ug Enero 2, 2025.
Sa bag-ohay lang nga interbyu sa radyo, si OCD Administrator Undersecretary Ariel Nepomuceno nihatag og gibug-aton sa kamahinungdanon sa pagpaminaw sa mga pasidaan gikan sa Philippine Atmospheric, Geophysical and Astronomical Services Administration (PAGASA), Mines and Geosciences Bureau, ug uban pang may kalabotan nga awtoridad.
Matud pa ni Nepomuceno nga kinahanglan nga seryosohon sa publiko kining mga sistema sa panahon, kay mahimo kining makadaot sama sa mga bagyo.
Iya usab gitumbok ang makalilisang nga pagbaha nga mikalas og 43 ka kinabuhi sa Kabisay-an ug Mindanao niadtong Enero 2023, tungod sa pag-ulan gikan sa shear line.
Gihatagan niini og gibug-aton ang panginahanglan sa pagpakusog sa mga paningkamot sa pagpangandam.
“Pagdating dito sa shear line, kailangan pa nating paangatin ang level ng paghahanda dahil parang nagkakagulatan po sa mga komunidad,” matud pa ni Nepomuceno.
Gipasiugda usab niini ang mga plano sa pagpalambo sa koordinasyon sa PAGASA aron maseguro nga adunay igong panahon ang mga komunidad sa pagpangandam sa grabeng panahon.
Samtang iyang giila ang pag-uswag sa mga paningkamot sa pagtubag, ang OCD chief usab nagpasiugda sa panginahanglan alang sa local government unit engagement pinaagi sa mga estratehiya sa pagpaminus sa kadaut, sama sa pinugos nga pagbakwit sa mga lugar nga adunay peligro, unahon sa 2025. (ECB/PIA7-Bohol)
