SAN JOSE, Antique (PIA) — Gin-agda kang opisyales kang dya nga probinsya ang mga Antiqueño nga makigbahin sa pagbantay kag pagprotektar kang kahilwayan kang Pilipinas.
Dya may kaangtanan sa pagselebrar kang Independence Day, ukon Adlaw kang Kahilwayan, kang pungsod nga gina obserbar kada Hunyo 12.
Sa anang mensahe sa ginhiwat nga ika-126 nga selebrasyon kang Independence Day, sa ngaran ni Gov. Rhodora Cadiao, gintugruan importansya ni Provincial Administrator Nery Duremdes ang kaisog, pagkabaganihan, kag sakripisyo kang mga Pilipino kang una nga tiyempo nga ginpakigbato ang kahilwayan kang pungsod.
Hambal ni Duremdes nagakaangay lang nga padayunon kang mga Antiqueño ang pagprotektar sa kahilwayan, sara sa mga pamaagi ang paggamit kang kinamatarong sa pagboto nga marayo sa impluwensya kang iban nga tawo.
Nagpangabay man si Duremdes nga binag-binagon ang selebrasyon kang Adlaw kang Kahilwayan kag mas pasangkaron ang pagpalangga sa pungsod sa tunga kang mga pagpanghangkat nga ginaatubang kang Pilipinas, kaangay kang tensyon sa West Philippine Sea (WPS).
Sa anang bahin, ginhambal kang tiglawas ni Vice Gov. Edgar Denosta nga si anay Philippine Air Force (PAF) Col. Luciano Saiyo nga sara pa sa mga pamaagi sa pagprotektar kang kahilwayan kang pungsod ang pagpakita kang suporta sa pagpakigbato kang Pilipinas para sa anang kinamatarong sa West Philippine Sea.
Wara’t sapayan nga handa ang Armed Forces of the Philippines (AFP) para depensahan ang soberanya kang Pilipinas, dugang hambal ni Saiyo nga bahul ang bulig kang pagpakita kang suporta kang kada Pilipino sa mga lihuk kang gobyerno sa pagprotekta kang teritoryo kang pungsod.
Pagkatapos kang programa sa pag-selebrar kang 126th Philippine Independence Day, may ginhiwat nga pagtanyag kang mga bulak sa monumento ni Dr. Jose Rizal sa pagkilala sa mga binuhatan na kag kang iban pa nga Pilipino nga baganihan sa paglab-ot kang kahilwayan. (AGP/BPS/PIA Antique)
