Photo courtesy of the Antique Provincial Information Office
SAN JOSE, Antique (PIA) — Nagapangandam sa publiko ang mga disaster risk reduction and management (DRRM) agencies sa epekto kang madamol nga pag-uran dara kang La Niña.
Bangod sa pag-uran nga dar-on kang ginapaabot nga La Niña sa mga masunod nga bulan, bahol ang mangin kahalitan sa mga komunidad kung wara ti preparasyon ang kada sara.
Hambal ni Antique Provincial DRRM Office (PDRRMO) chied Broderick Train, importante ang paggamit kang insakto nga impormasyon sa pagpreparar sa mga kalamidad kag pagplano para protektaran ang kaugalingon kag pamilya.
Dugang ni Train, kinahanglan nga i-monitor permi ang weather updates kang Philippine Atmospheric, Geophysical, and Astronomical Services Administration (PAGASA) kag gilayon nga magpreparar kun may nareport nga malain nga tyempo.
Nagpangandam man ang opisyal kang posibilidad kang liwat nga pagtuhaw kang mga landslide kag pagbaha sa mga lugar nga gintunaan ron kang dyang mga insidente kang una.
Suno sa datos kang Mines and Geosciences Bureau (MGB), duro nga mga lugar sa Antique ang masami ginabaha kag ginatunaan kang landslide.
Sa bahin ni Office of Civil Defense (OCD)-6 Information Officer Maria Christina Mayor, ana gintugruan igtalopangod ang pagpabilin kang katinlo sa palibot para wara ti basura nga magsupon sa drainage system kung mag-uran.
Dugang na pa, bahol ang papel kang marabong nga kagubatan sa pagtapna kang pagbaha, gani, ang ana pag-imbitar sa publiko nga makigbahin sa tree-growing kag reforestation activities.
Samtang, ginpalab-ot kang PAGASA-Iloilo sa publiko nga sa tulad nga panahon, mas naga duro kag mas naga rapit sa kalupaan ang pag-develop kang mga bagyo nga nagaresulta sa mas gamay nga oras para magpreparar.
Gani, ginrekomendar ni PAGASA-Iloilo DRRM unit head Christian James Jandayran sa kada pamilya nga mangin handa kag preparado sa tanan nga tion.
Bangod man sa nagarapta nga false information online, ana ginpahanumdom sa publiko ang pag-verify kang source antes mag-share kag magpati lang gid sa weather information kang PAGASA. (AGP/BPS/PIA Antique)
