Photo by PhilHealth
NEGROS OCCIDENTAL (PIA) — Isa ka doctor sang gobyerno ang nagpaandam sa publiko nga ang Leptospirosis makuha sang isa ka tawo paagi sa pilas, mata, kag pag-inom sang kontaminado nga tubig.
Ginpahayag ni Dr. Robert Guanzon nga consultant sa Infectious Disease sang Corazon Locsin Montelibano Memorial Regional Hospital (CLMMRH) nga ang Leptospirosis ang isa ka bacteria nga makuha sa pagpaligo sa tubig baha nga kontaminado sang ihi sang ilaga kag makamamatay ini nga masakit kon hindi sa gilayon madapatan sang nagaka-igo nga bulong.
Ang ini nga masakit kalabanan nagatuhaw kun tag-ulan kag labi na kon may bagyo, dugang niya.
Nahibaluan nga lakip sa mga sintomas amo ang hilanat, palanakit sang ulo kag likod, nagapula ang mata, kag nagapalangdalag.
Sa malala nga kahimtangan ang pasyente ang nagakaubusan sang ihi, nagadupla sang dugo, hindi mapahamtang kag hindi na maistorya. Ang iban nagakinahanglan na nga i-dialysis bangud sang pagkaguba sang bato-bato kag atay.
Sa masami ang ulihi nga pagpakonsulta ang mayor nga kabangdanan sang pagkalala sang pasyente nga nagatuga sang kamatayon.
“Makaluwas sang kabuhi ang pagpakonsulta sang temprano,” suno kay Guanzon.
May mataas nga posibilidad magka Leptospirosis ang mga nagaobra sa humayan kag ang nagabantay o sagud baboy, baka, kanding bangud ang ini nga mga kasapatan sarang man matapikan sang Leptospirosis.
Agud malikawan ang ini nga masakit, ginahingyo ang publiko nga maghugas sang kamot gamit ang matinlo nga tubig kag sabon, likawan mag ubog sa tubig baha o magsuksok sang botas kon kinahanglan, takpan ang pilas agud ma protehiran ini, kag mag-inom sang anti-biotics bilang prophylaxis nga base sa rekomendasyon sang doctor.
Sang damlag lang ginpahayag ni Dr. Grace Tan nga hepe sang Bacolod City Environmental Sanitation Division nga humalin Enero 1 tubtob August 10 sang sini nga tuig nakarekord ang syudad sang 15 ka mga kaso sang Leptospirosis kon diin anum ang nagkalamaatay. (AAL/Lljr/ PIA6 Negros Occidental)
