TAGBILARAN CITY, Bohol, Jan. 3 (PIA) — Nagdugang og P19,400 nga pundo ang Bohol pinaagi sa supplemental budget nga giduso sa Provincial Development Council Executive Committee aron may ikatanyag nga pahalipay sa kwalipekado nga trabahante nga nagtrabaho subay sa contract of service ug job orders.
Sa Resolusyon No. 59-2022 sa PDC Execom, gihimong pormal niini ang supplemental nga kantidad aron pundohan ang una na nga natumbok nga nag-unang inisyatiba sa 2022, alang sa gratuity pay sa mga nahisgutang empleyado.
Kahinumduman nga niadtong Disyembre 23, si Presidente Ferdinand Marcos Jr., mipagawas sa Administrative Order No 3, nga nagtumbok sa paghatag og dugang pahalipay ngadto sa mga nanarbaho pinaagi sa contract of service ug job order, pinaagi sa dugang suhol, bisan pa man nga wala na kini sa kontrata.
Matud pa sa PDC nga gipangunahan ni Gobernador Erico Aristotle Aumentado, angayan lamang nga tagdon ig ilhon ang kakugi ug paghago sa mga JOs ug contractural workers sa ilang krusyal nga pagpatuman sa mga programa, proyekto ug kalihukan nga maoy gisaligan sa kagamhanan sa pagpadangat sa serbisyo ilabi na niadtong nagka pandemya sa COVID-19 ug sa mga krisis nga minglabay.
Alang sa kinatibuk-ang kagamhanan sa Bohol, gibanabana nga ang P19 milyones ug 400 mil, nga maoy unod usab sa supplemental budget nga giduso, nahasulod sa Investment Program (IP) sa Bohol alang sa calendar year 2022.
Una na nga nataho nga adunay dyutay nga nahipos ang Bohol nga wala magamit nga pundo gikan sa iyang maintenance and other operating expenses (MOOE) sa 2022 Annual Budget.
Kini karon maoy nasigpatan nga mahimong pundo unya nga magamit human usab kini kahimoan og Appropriation Ordinance nga magtugot sa Supplemental Budget.
Ang pagpahiluna sa Investment Plan nunot niini nga pagpahat, nagsubay sa Joint Memorandum Circular No. 01-2007 ug JMC No. 1 2016 sa Department of the Interior and Local Government (DILG), National Economic Development Authority (NEDA), Department of Budget and Management (DBM) ug sa Department of Finance (DOF), apil na ang Budget Operations Manual (BOM) sa DBM, diin ang mga local government units (LGUs) gimanduan nga suportahan kanunay ang ilang mga budget sa investment plans.
Kahinumduman nga una na usab nga napahiluna sa Bohol ang SIP No. 9 alang sa CY 2022, ug human marepaso ug madebatehan, nakita nga kini haum sa panginahanglan subay sa development thrust sa paghatag og gitugot nga incentives ug tabang sa mga contractual workers ug JO.
Human sa PDC resolution, kini na usab tabuylogan sa Sangguniang Panlalawigan sa Bohol aron madawat na unya sa mga trabahante ang ilang kalipayon. (RAHC/PIA7 Bohol)
