SYUDAD SANG ILOILO (PIA) — Isa ka Memorandum of Understanding ang ginlagdaan sang lokal nga panguluhan sang Batad kag gobyerno probinsyal angot sa Purok Resilience Program (PRP) sang probinsya nga ginapatigayon sa Brgy. Nangka, Batad.
Ginpangunahan ni Gov. Arthur Defensor Jr., Batad Mayor Elvira Alarcon kag Homeless People’s Federation of the Philippines Inc. (HPFPI) National President Nerissa Germanelo ang pagpirma sang MOU.
Ginakabig ang PRP bilang isa ka bag-uhanon nga socialized housing program para sa mga komunidad nga naapektuhan sang baha kag landslide.
Ginlunsar ang ini nga proyekto sang Marso 2024 kun sa diin nangin pilot site ang Brgy. Nangka.
Naglab-ot sa P30 million ang pundo nga ginpain para sa proyekto nga makabenepisyo sang 30 ka pamilya gikan sa landslide-prone area.
Ginpatpat sa MOU ang mga nanarisari nga mga responsibilidad sang LGU, gobyerno probinsyal, Bragy. Nangka kag HPFPI tuhoy sa pagdevelop sang komunidad kag paghanda sang mga hilikuton sang PRP.
Napahamtang ang pilot site sa malapad nga 5,000-square meter lot sang banwa kag ini ang ginabug-usan sang 10 ka buildings. Ang tagsa ka building may yara sang three-unit shelters.
Nalakip man sa triplex shelters ang mga espasyo para sa kwarto, palaliguan, kusina, kag sala. Dugang pa, may yara ini sang ceramic tiles, fiber cement board para sa atop, metal roof nga may insulators kag solar rooftop panels.
Sa karon, yara na sa 10-15% ang natapos nga bahin sang proyekto. Padayon man ang pagpatukod sang kalsada kag drainage system sini. (AAL/LMLE/PIA Iloilo)
