SYUDAD SANG ILOILO (PIA) — Nag-upod ang Philippine Veterans Affairs Office (PVAO) kag ang Agricultural Training Institute (ATI) sa paghatag sang mga training program kaangut sa agrikultura kag pangisda agud mapasanyog ang mga oportunidad sa palangabuhian sang mga Filipino nga beterano, ila asawa kag dependents.
Ginpahayag ni PVAO Iloilo office-in-charge Glen Castañares sa isa ka hinun-anon upod sa Philippine Information Agency – Iloilo nga ang PVAO kag ATI sining damlang lang ang naglagda sang memorandum of agreement para sa mga agricultural training program para sa mga beterano kag ila pamilya gindesinyo agud hatagan sila sang kinahanglanon nga kalam kag kasampat agud mabuligan sila para sa tayuyon nga palangabuhian.
“We are looking forward partnering with the Agricultural Training Institute of the Department of Agriculture for these training programs for our veterans to supplement their pensions,” pahayag ni Castañares.
Sa karon suno kay Castañares ginafinalize na sang PVAO Central Office ang guideline para sa implementasyon sang programa sa tanan nga rehiyon sa pungsod.
“When the guideline is out, we will see to it that the program will be accessible to every veteran and their family who are interested to avail of this opportunity,” dugang ni Castañares.
Ang mga paghanas ang isa gid lamang sa madamo nga benepisyo kag programa nga ginadumalahan sang PVAO agud suportahan ang mga Filipino nga beterano nga amo yadtong naghatag sang military service sa tion sang World War II, Korean war kag sa Armed Forces of the Philippines.
Ginalakipan ining mga programa sang old-age pension, disability pension, death pension, educational benefit, burial assistance kag hospitalization kag medical care program.
Ginsiling ni Castañares nga padayon ang ila pagtinguha nga mapasanyog kag mapasangkad ang mga benepisyo kag pribilihiyo sang mga beterano kag ila dependent agud masabat ang ila mga kinahanglanon.
Sa isla sang Panay kag Guimaras, may yara sang kapin 6,500 ka mga pensionado kag 9 sini sa ila ang buhi nga mga beterano sang World War II santo sa active pension database sang ahensya, tubtub sining Enero sang karon nga tuig.
Sa pagselebrar sang pungsod sang Philippine Veterans Week humalin Abril 5 tubtub 11, ginpahanumdom ni Castañares ang tanan sa mga sakripisyo sang sining mga maisog nga kalalakinhan kag kababaenhan sa pagproteher kag pagpreserbar sang kahilwayan.
Sini nga tuig ang selebrasyon may tema “Kabayanihan ng beterano: Sandigan ng kaunlaran ng Bagong Pilipinas,” nga nagahatag importansya sa palanan-awon sang PVAO para sa isa ka mabaskog kag nagahi-usa nga Filipino Veterans Community nga nagaserbe nga masaligan nga katuwang sa pagtukod sang nasyon. (AAL/LAF/PIA Iloilo)
