ROXAS CITY, Capiz (PIA) — Kabilogan nga 523 ka mga mangunguma sang niyog ang nagtapos sa 16 ka semana nga School-On-Air sa Coconut Production and Processing sang Agosto 13 sa Gerry Roxas Training and Convention Center sa Brgy. Dayao, Roxas City.
Ang SOA sa “Masaganang Coco-Buhayan: Radyo Eskwela sa Pagniniyugan” ang gin-disenyo agud maghatag sang kinahanglanon nga ihibalo kag kaalam sa mga mangunguma agud mapataas ang ila produksyon, madugangan ang kita, kag mapaayo ang kabug-osan nga kalidad sang produkto sang niyog.
Ini nga inisyatibo ang natigayon sa pagbuliganay sang Philippine Coconut Authority, Agricultural Training Institute, kag Capiz provincial government paagi sa Radyo Maragtas nga nagbrodkast kag nag live stream sang programa.
“Nakatu-on ako kon paano magpili sang maayo nga mga binhi sang niyog, ang angay nga lugar tamnan sang niyog, husto nga distansya sa pagtanum sang mga niyog, paghibalo sang mga peste sang niyog, intercropping, subong man pagsagod sang mga sapat sa plantasyon sang niyog, kag pagproseso sang nakuha nga mga niyog,” ang pahayag sang SOA graduate nga si Jomer Marcelino.
Gindugang pa sang 47-anyos nga mangunguma nagikan sa Brgy. Timpas sa banwa sang Panitan nga gusto niya makadihon sang produkto nga nakabase sa niyog halin sa iya natun-an sa SOA agud mapa-level up ang iya palangabuhian nga nasandig lamang sa copra production kag pagbaligya sang lahin sang niyog nga iya napatubas.
Samtang, isa pa ka SOA graduate nga 48-anyos nga processor sang niyog nga si Remia Locsin nagpahayag nga gusto niya mahibaluan kon ano pa ang mga ahensya nga nagapatuman sang Coconut Farmers and Industry Development Plan (CFDIP) agud magpangayo sang ila bulig sa pag-develop sang mas madamo pa nga mga food kag non-food nga mga produkto nga nakabase sa niyog.
“Bilang processor sang niyog, nakadevelop ako sang buko nuggets, buko gravy kag bottled buko water,” ang pahayag ni Locsin nga general manager man sang Dulangan Farmers Marketing Cooperative nga nakabase sa banwa sang Pilar nga banwa.
“Gusto namon mag-produce sang fresh buko juice bilang alternatibo sa softdrink,” dugang pa niya.
Ang mga SOA graduates ang nagikan sa mga kabanwahanan sang Ivisan, Jamindan, Maayon, Panitan, Pilar, Pontevedra, President Roxas, Sapian, Sigma kag Tapaz.
Ang graduation ceremony gintambongan nanday PCA regional manager Neil J. Melencion, PCA Capiz chief Andy Laurilla, mga opisyal sang ATI 6 nga ginpangunahan ni center director Mary Ann Ramos kag Radyo Maragtas station manager Lyndofer Glenn Beup, kag iban pa. (AGP/AAL/PIA Capiz)
