ILOILO CITY (PIA) – Ginpahibalo sang Regional Council Against Child Labor (RCACL) ang mga miyembro sini nga mga ahensya kaangot sa mga binuhatan kontra child labor sa rehiyon.
Kaangot sini, naghatag sang impormasyon ang Department of Labor and Employment (DOLE) 6 sa estado sang child labor prevention and elimination program, Philippine Program Against Child Labor (PPACL) strategic framework para sa 2024-2028, kag balita sa 2024 monitoring sang child laborers sang Septyembre 25.
Samtang ginpaabot ni OIC Assistant Regional Director Melisa S. Navarra sang DOLE 6 ang importansya sang pagbinuligay sa pagdihon sang mga plano para masiguro ang kamaayuhan kag proteksyon sang mga kabataan kasunod sang iya pambungad nga mensahe sa nasambit nga pagtilipon.
“The DOLE has always been at the forefront of providing assistance to child laborers and their parents with the main goal of having a child-free Philippines, envisioning the impact of a resilient, transformed, empowered life of child laborers, children at risk of child labor, and families and communities, towards a sense of self-worth and holistic and sustainable development,” suno kay Navarra.
Dugang niya pa, kinahanglan ang “interagency approach” para maghatag programa ilabi na sa pagresolba sang problema nga child labor, indi lamang paagi sa interagency activities kundi pati man sa bahin sang local government units.
“I think we all know that it really takes a village to care for a child and to provide welfare and protection to the children, much more to end child labor,” siling ni Navarra.
Iya man ginpahibalo nga nakatukod naman ang DOLE sang partnerships sa mga LGU ilabi na sa paghatag sang livelihood programs para sa mga ginikanan sang child laborers.
Base sa monitoring report tubtob August 31, 2024, ginpahibalo sang DOLE nga may ara 12,157 ka child laborers ang gin-profile humalin tuig 2018 tubtob 2021.
Kung datos sa 2024 lang ang pagabasehan, naka-rekord ang rehiyon sang 421 ka mga child laborers nga ginbug-usan sang Aklan, 13; Antique, 139; Capiz, 22; Guimaras, 2; Iloilo, 97; kag Negros Occidental, 148.
Sa bahin naman sang mga referral sang child laborers, ang ila mga kinahanglanon napalab-ot naman sa nagkalain-lain nga mga ahensya sang gobyerno.
Sa idalom sang DOLE, may ara 10,403 nga ginbuligan paagi sa nanari-sari sini nga mga programa magluwas pa sa Department of Social Welfare and Development nga may ara 2,236 requests nga napalab-ot na; Department of Education nga may ara 1,306 nga mga benepisyaryo nga ginkilala; Technical Education and Skills Development Authority may ara 2,331 nga requests para sa skills training; Department of Health nga may 87 requests para sa medical assistance; Commission on Higher Education nga may 1,038 scholarship requests; National Housing Authority may ara naman 107 housing requests kag Philippine Statistics Authority nga may 12 registration assistance. (AAL/AGP/PIA 6)
