Mismo si Presidente Ferdinand “Bongbong” R. Marcos Jr. ang nakasaksi sa paghangyo sa RDC-7 ngadto sa DOTr nga pundohan ang feasibility study sa monorail, inay ipatuman ang Panglao Tagbilaran BRT project. (PIA Bohol)
TAGBILARAN CITY, Bohol (PIA) — Human ikasugyot sa Regional Development Council -7 (RDC-7) Development Administration Committee (DAC) nga tun-an ang pagpahimutang sa monorail system alang sa Metro Tagbilaran, gipasupot dayon sa konseho ngadto sa Presidente ang hangyo sa rehiyon ngadto sa Department of Transportation (DOTr) ang pagpundo alang sa feasibility study (FS) niini.
Kahinumduman nga ang DOTr naglaraw na sa ilang mga giprograma nga mga imprastraktura ang pagpahimutang sa Panglao Airport-Tagbilaran City Bus Rapid Transit (BRT) alang sa sunod nining ghugna sa mga proyekto.
Ang BRT us aka de-kalidad nga panakyanan nga bus nga nagsaad sa mas paspas ug kasaligan nga transportasyon nga maglakip sa mga lanes sa kadalanan nga walay laing pwede mogamit, mga agi-anan nga estriktong para sa bus lamang, prayoridad sa pagpalusot kon ma-traffic, sitematiko nga pagkobra sa pletehan ug mga impratsraktura sama sa mga estasyonan ug nga elevated highway ug platforms.
Apan, sa nasinati sa Tagbilaran City nga mga suliran sa magkadaghan nga sakyanan ug walay umento sa kalapadon sa kadalanan, nagkagrabe ang gulgot sa traffic, nga kon mapun-an kini sa BRT, mas mograbe pa ang sitwasyon.
Tungod niini, gikasugyot na sa mga Bol-anon sa RDC, nga inay ipatuman ang biniyon nga proyekto sa BRT sa Panglao airport ngadto sa Tagbilaran, ang pundohan, ang monorail system na lamang.
Ang monorail usa la matang sa tren apang ang agi-anan niini, usa ka single elevated rail, beam o track nga mahimong subayan sa tren.
Ang monorail, kasaligan, mas daghan ang makasakay kay public transport man kini, gaan sa kalikopan, mas sayon nga ipabarug, ug mas barato ang pagpadagan niini.
Gisugyot ni Argeo Melisimo sa RDC DAC chairperson nga ang pundohan mao na lamang ang monorail system nga gikan sa Alburque paingon sa Tagbilaran ngadto sa Maribojoc, Corella ngadto sa Tagbilaran paingon sa Panglao.
Samtang kini gipadayon nga gihisgutan kon kauyonan ba kini sa katawhan, gihangyo na sa RDC7 ang DOTr nga pundohan ang paghimo og feasibility study alang sa ingon nini nga mass transport projects ilabi na sa mga urban centers sa Cebu, Bohol ug Negros Oriental. (RAHC/PIA Bohol)
