MALAYBALAY CITY (PIA) — “Among gi-awhag ang mga aktibong myembro sa NPA nga mohimo na og aksyon karon. Dili kini magdugay. Sa Marso 2026, kining talagsaong higayon wala na. Gusto namo ipahibalo nga wala kamo mag-inusara. Andam ang gobyerno nga mosuporta sa inyong pagbalik sa komunidad,” matud ni Brig. Gen. Michele B. Anayron Jr., commander sa 403rd Infantry Brigade, atol sa Bukidnon Interaction niadtong Enero 12, nga gisibya sa 15 ka KBP-accredited nga mga estasyon sa radyo sa tibuok probinsya.
Gipahibalo sa gobyerno ang 2025 Peace and Development Roadmap, nga naglakip sa mga programa aron matabangan ang mga kanhing rebelde sa NPA nga mobalik sa panginabuhing normal pinaagi sa pinansyal nga ayuda, panginabuhian, ug mga skills training.
Samtang gi-awhag ang mga NPA nga anaa pa sa kabukiran nga mosurender sulod sa amnestiya hangtod sa Marso sunod tuig, miingon si Anayron nga ang maong plano naglangkob sa Enhanced Comprehensive Local Integration Program (E-CLIP) isip usa sa mga haligi sa reintegration ug kalinaw.
Gipasabot niya ang kamahinungdanon sa pagpili sa kalinaw karon samtang bukas pa ang kahigayonan sa amnestiya, aron makabalik sa komunidad ang mga NPA nga walay kahadlok nga mapriso.
“Usa kini ka higayong dili dapat usikan. Ania kami aron motabang sa ilang pagpanginabuhi, dili aron gub-on kini. Pinaagi sa pagsurender ug suporta sa maong programa, makaikyas sila sa panagbangi ug makab-ot ang mas hayag ug lig-on nga kaugmaon alang sa ilang pamilya,” matud ni Anayron.
Ang E-CLIP naglangkob sa P15,000 nga emerhensyang pinansyal nga ayuda, P50,000 nga panginabuhian, ug access sa 250 ka housing units sa Malaybalay ug Cagayan de Oro City. Apan, gibutyag ni Anayron nga dunay pipila ka housing units nga wala pa mapuy-an, hinungdan sa usa ka pagrepaso aron mas daghan pang kanhi rebelde ang makapahimulos niini.
Ang Executive Order No. 70, maoy nagpaluyo sa programa ug nagpatuman sa whole-of-nation approach aron makab-ot ang inclusive ug sustainable nga kalinaw. Pinaagi niini, natukod ang National Task Force to End Local Communist Armed Conflict (NTF-ELCAC) nga naghiusa sa lain-laing ahensya sa gobyerno alang sa kalinaw.
“Ang resulta sa Bukidnon talagsaon tungod kay nakab-ot sa 403rd Infantry Brigade ang 95 porsyentong satisfaction rate sa operasyon,” dugang ni Anayron.
Gihatagan og gibug-aton ang technical ug vocational skills training sa Patpat, Malaybalay City, nga maoy maoy yawe sa paghatag kahibalo sa mga kanhi rebelde, nga gitawag na karon og Friends Rescued (FRs). Ang maong eskwelahan nakigtambayayong sa Department of Trade and Industry (DTI), Department of Labor and Employment (DOLE), ug Department of Social Welfare and Development (DSWD) aron makatabang sa ilang pagbalik sa normal nga panginabuhi.
Dugang ni Anayron nga lig-on ang suporta sa gobyerno alang sa mga rebelde nga mobalik sa sabakan sa komunidad. Miingon siya nga ang Philippine Army anaa aron sa pagpalambo sa kalinaw, dili sa pagduso og panagbangi.
“Amo lamang giatubang ang mga hulga sa kalinaw. Ang among tumong mao ang paghiusa, dili ang gubat. Duna nalang 14 ka bulan alang sa mga aktibong NPA aron maka-avail sila sa amnestiya ug sa mga benepisyo niini.
Ang pagpili sayon lang: ipadayon ang kinabuhi nga puno sa kawalay kasiguruhan, o mosulod sa usa ka kaugmaon nga puno sa kalinaw ug kahigayonan. Karon na ang tukmang panahon,” matud ni Anayron. (JMC/PIA 10/Bukidnon)
