SYUDAD SANG ROXAS, Capiz (PIA) — Maid-id nga gina-monitor sang mga katapo sang Agri-Aqua Laboratory sang Office of the Provincial Agriculturist ang estado sang Paralytic Shellfish Poison ukon red tide nga naga-apekto sa kalalawran sang probinsya.
Ginpahayag ni Ramie Lyn Bañares nga Acting Head sang Fisheries Division sang OPA nga nagapadala ang probinsya sang “meat samples” sang pakinhason sa Bureau of Fisheries and Aquatic Resources – Central Office tagsa ka semana agud nga mahibaluan ang “toxicity level” sang mga pakinhason sa kadagatan nga apektado sang red tide.
Nahibaluan nga apektado sa gihapon ang kalalawran sang Capiz ukon ang kadagatan sang Roxas City kag mga kabanwahanan sang Ivisan, Sapian, Panay, Pontevedra, President Roxas kag Pilar sang red tide base sa Shellfish Bulletin No. 26 sang BFAR nga gin-isyu sang Nobyembre 10.
Ginpahayag ni Chris Anthony Alba nga Public Information Officer sang Pilar nga dalagko na gid ang mga tahong sa banwa apang ginabawalan ang
pagpanginhas bangud sang kontaminasyon sang red tide.
Matandaan nga sa banwa sang Pilar nauna nga naglanog ang balita sa red tide sadtong Agosto karon nga tuig matapos nga may isa nga napatay sa mga ginadudahan nagkalahilo kag naospital bangud sa pagkaon sang “shellfish.”
Samtang ginpangunahan naman ni Pangulong Ferdinand R. Marcos, Jr. sadtong Oktubre 6 sa Capiz Gym sang Villareal Stadium ang pagpanagtag sang 25 ka kilo nga bugas sa 1,000 nga mga pumoluyo sa Roxas City nga naapektohan ang palangabuhian bangud sang red tide.
Dugang pa ang pagpanagtag man sang mga family food packs sang lokal nga panguluhan sang probinsya sa tanan nga mga apektado sang red tide sa syudad kag kabanwahanan.(AGP/AAL/PIA Capiz/Photos from Florie May Castro)
