SYUDAD SANG ILOILO (PIA) — Isa ka reforestation project ang ginapatuman sa isla sang Panay agud ibalik ang malapit sa 200,000 nga ektarya sang nakalbo nga kagulangan.
Ginabuylugan ang ini nga proyekto nga ginkilala bilang Re-greening of Panay pinaagi sa kasugtanan sa tunga sang Philippine Army, Bureau of Fire Protection-Iloilo (BFP), kag Sulu Garden Foundation.
Nalakip sa mga naglagda sang memorandum of agreement amo sanday 301st Infantry Brigade Commander BGen. Michael Samson, Sulu Garden Foundation President & Chairman of the Board Jonathan Matias, Iloilo Provincial Fire Marshal FSSupt Bartolome Beliran, Vice Chair Araceli Adrias, kag 61st Infantry Battalion Commanding Officer Lt.Col. Arturo Balgos Jr.
Ang ini nga proyekto nagagamit sang seed ball technology kun sa diin ining mga seed balls ang clay-coated kag may mga liso sang tumandok nga mga kahoy nga mahimo isabwag sa mga malayo kag mataas nga mga kabukiran.
Sa bahin ni 301st Brigade Commander BGen. Samson, iya ginpasalig ang suporta sang 301st Brigade sa pagpatigayon sang proyekto.
“We are one with the people of Panay on this reforestation program. We look forward to the success of this project. We may not see the result, but at least we became part of the plan of the seed balls that may become the forest of tomorrow,” pahayag ni Samson.
Samtang, nagpangako si Iloilo Provincial Fire Marshal FSSupt Beliran sa pagpasanyog sang mga inisyatibo sa pagtipig sang palibot.
Kabahin man sa kasugtanan nga ginlagdaan amo ang paghatag sang teknikal nga suporta kag resources sang ini nga mga ahensya sang gobyerno sa paghiwat sang field tests sa mga mabudlay lab-uton nga mga kabukiran. (AAL/LMLE/PIA Iloilo)
