Photo courtesy of PSA Antique
SAN JOSE, Antique (PIA) — Tuyo kang Philippine Statistics Authority (PSA) nga mas pataason ang numero kang mga kabataan nga narehistro sa Philippine Identification System (PhilSys) paagi sa “Rehistro Bulilit” campaign.
Ang dya nga kampanya may katuyuan nga irehistro sa PhilSys ang mas duro nga mga kabataan nga naga-edad isa tubtob apat ka tuig kag matugruan kang andang kaugalingon nga National ID.
Sa Antique, ginhiwat kang PSA kang nagligad gid lang ang pinaka-una nga Rehistro Bulilit sa Barangay Maybato North sa banwa kang San Jose de Buenavista, kung sa diin 22 ka kabataan ang narehistro.
Sa anang mensahe sa nasambit nga aktibidad, ginhambal ni PSA Antique head Randy M. Tacogdoy nga importante ang pagrehistro kang mga Pilipino sa PhilSys hay dya nagaduso kang kinamatarong sa pagkakilanlan kang kada sara.
Ginpahanumdom man ni Tacogdoy nga dapat batunon sa pareho pampubliko kag pribado nga transaksyon ang National ID formats kaangay kang National ID card, ePhilID, kag ang pinakabag-o nga Digital National ID.
Ana gintugruan igtalopangod ang validity kang National ID bilang pruweba kang pagkakilanlan.
May pagahiwaton man nga dugang nga Rehistro Bulilit events sa mga masunod nga bulan para magrehistro kang mas duro pa nga mga kabataan.
Para sa schedule kag venue, ginapangabay kang PSA ang publiko nga bisitahon ang andang official Facebook page @PSA Antique. (AGP/BPS/PIA Antique)
