SYUDAD SANG ILOILO (PIA) — Nagpatigayon sang mga hilikuton ang Reserve Command (RESCOM) sang Philippine Army sa Visayas sa katuyuan nga mapasanyog ang ikasarang kag koordinasyon sang Reserve Force.
Kalakip sa mga aktibidad amo ang pagtililipon para sa Ready Reserve Unit (RRU) commanders kag ang paghinun-anon para sa mga lideres sang Reserve Officers’ Training Corps (ROTC) nga dungan nga ginpatigayon sa 301st Infantry Brigade Headquarters sa Camp Hernandez sa Dingle, Iloilo.
Ang sentro sang mga aktibidad amo ang pag-aman sang ihibalo sa mga Reserve Unit Commanders sa mga pinakabag-o nga polisiya kag proseso sa Reserve Force Management.
Tinutuyo man sang mga aktibidad nga mas mapasangkad ang ila ihibalo kon paano mas epektibo nga masuportahan ang Infantry Divisions kag Brigades sang Philippine Army. Nagpasakop sa aktibidad ang RRU commanders humalin sa 6th, 7th, kag 8th Regional Community Defense Groups (RCDGs).
Nangin kaundan man sang pagtililipon ang mga presentasyon kag diskusyon sa nagkalainlain nga topiko lakip na ang Reserve Force Development Program, RESCOM Command Thrusts and Accomplishments, Command Relationship/Role of Ready Reserve Infantry Brigades and Battalions, kag ang 3ID Campaign Plan kag Reserve Force Development Program.
Matapos ang pagtililipon, ang Civil-Military Operations Regiment (CMOR) nagpatigayon sang workshops kag presentasyon sang mga output.
Sa pihak nga bahin, nakasentro naman ang paghinun-anon sang ROTC sa RCDG Operational Evaluation nga nagtipon sang mga ROTC Commandants kag Corps Commanders sa mga nasambit nga yunit para hibaluon ang mga estratehiya sa pagsakdag sang paghiliusa sa mga yunits kag para mapasanyog ang “operational readiness.”
Nagtambong sa duha ka aktibidad sanday Major General Romulo Manuel Jr., RESCOM Commander; Brigadier General Benjamin Hao, Commander sang Civil-Military Operations Regiment; Colonel Lennon Babilonia, 3rd Infantry Division Assistant Division Commander for Reservist and Retiree Affairs; kag commanders sang tatlo ka RCDGs sa Visayas, kaupod ang iban pa nga opisyales halin sa Reserve Command.
Nagpasalamat man ang pamunuan sang 3rd Infantry Division sa paghiwat sang mga aktibidad nga ginlantaw nga mas magapabaskog sang Reserve Force sa Division’s Area of Operations.
“The role of the Reserve Force is crucial to our journey towards establishing a state of Stable Internal Peace and Security (SIPS) in Western and Central Visayas. They are an indispensable force multiplier, and their readiness and capability are vital to our goal,” suno kay Major General Marion R. Sison, Commander sang 3ID.
Ginhambal man ni Sison nga ang pagtililipon kag hinun-anon ang mga paagi sang RESCOM para masiguro nga ang Reserve Units may husto nga ihibalo, ikasarang kag resources nga ila kinahanglan para mas epektibo nga masuportahan ang ila operasyon, kaangay lang nga handa ang Reserve Force sa pagresponde sa anuman nga paghangkat kaangay sang kalamidad, humanitarian crisis, ukon pagpamahog sa seguridad.
“I am confident that our Reserve Force is up to the task, and I am proud to be working alongside them to achieve a peaceful and progressive Visayas,” dugang pa ni Sison. (AAL/AGP/PIA 6/3ID Infantry Division sang Philippine Army)
