RJSCC 6 ginsuguran na ang checkpoint ops para sa 2025 nga eleksyon

SYUDAD SANG ILOILO (PIA) – Ginsuguran na sang mga myembro sang Regional Joint Security Control Center (RJSCC) 6 nga ginapangunahan sang Commission on Elections (COMELEC) ang dululungan nga checkpoint operations sang Enero 12, 2025 sa Police Regional Office 6, Camp Martin T. Delgado, Iloilo City.

Ang ini nga operasyon may kaangtanan sa nagahilapit nga 2025 National and Local Elections (NLE) kag Bangsamoro Autonomous Region in Muslim Mindanao (BARMM) Parliamentary Elections (BPE).

Ang paglunsar sini ginpangunahan ni COMELEC 6 Regional Election Director Atty. Dennis L. Ausan; PBGen. Jack Wanky, Direktor sang PRO6; kag MGen. Marion R. Sison, commander sang 3ID. Yara man si BGen. Michael G. Samson, commander sang 301st Brigade, kag Cdr. Richard G. Gura, commander sang Coast Guard Iloilo Station.

Bilang deputized nga COMELEC agency, ang Armed Forces of the Philippines (AFP) magasuporta sing aktibo sa Philippine National Police (PNP) sa pagpatuman sang election ban, pagpugong sa mga gamo, kag pagprotektar sang kahilwayan sa bug-os nga eleksyon humalin Enero 12 tubtob Hunyo 11 subong nga tuig.

Sa sini nga nga mga ti-on, magapatuman sang mga layi sa eleksyon kalakip na ang firearm ban kag pagdumili sa paggamit sini sang security personnel.

Sa iya mensahe, ginhatagan pagtamod ni  Ausan ang nahauna nga papel sang RJSCC nga amo ang implementasyon sang gun ban, kung sa diin iya ginpunto nga may yara nga checkpoint launches sa bug-os nga pungsod.

“We are entering the official campaign season for the National campaign that will start from February 11 and eventually the campaign period from local positions will start from March 28 and will end on May 10, 2025,” siling ni Ausan.

Dugang pa ni Ausan, dala man sa mandato sang RJSCC nga makig-angot sa rehiyonal kag lokal nga lebel  para masiguro ang  kalinong ilabi na sa patag sang seguridad.

Nagpasiguro naman si Wanky kag Gura nga magahatag sila sang bug-os nga suporta sa implementasyon sang gun ban.

Sa iya nga bahin,  gin-anunsyar ni Sison nga ang Western kag Central Visayas hilway na sa impluwensya sang Communist Terrorist Group (CTG).

 “We dismantled the two guerilla fronts and now the 3ID is gearing toward the declaration of the Panay Island as Stable Internal Peace Security status,” siling ni Sison.

Iya ginpunto ang padayon nga kolaborasyon sa PRO6 sa pagminitinar sining mga binuhatan, samtang ginapasiguro sini sa COMELEC 6 ang bug-os nga suporta sang 3ID sa bahin sang resources, manpower, kag logistics.

“Rest assured that your Army in Western Visayas will always be in support with our COMELEC 6 whatever resources we have, manpower and logistics,” suno kay Sison.

Dugang pa, naghatag man siya sang hugot nga pahanumdom sa mga politiko nga tuyo makipagbuligay  sa CTGs kon sa diin ginpunto niya nga ang amo nga sahi sang pag-alyansa mahimo nga magdulot sa ila sang kapaslawan.

“Any support or involvement with CTGs will ultimately lead to your downfall. Giving in to their demands is a kiss of death,” pagpangandam ni Sison. (AAL/AGP/PIA 6 kalakip ang mga balita gikan sa Philippine Army Spearhead Troopers)

In other News
Skip to content