TAGBILARAN CITY, Bohol (PIA) — Ang Regional Tripartite Wages and Productivity Board (RTWPB) 7 adunay gahum nga sugdan ang proseso sa pagdeterminar sa suholan (moto propio).
Sa Notice of Public Hearing nga gi-issue ni Chairperson Lilia A. Estillore, ug gipatik sa mantalaang Banat News niadtong Agosto 2, 2024, ang mosunod nga mga petsa gitakda alang sa sunodsunod nga Public Hearings nga ipahigayon sa rehiyon: Agosto 20 sa DepEd Ecotech Center sa Lahug, Cebu; Agosto 28 sa Balamban Municipal Hall, lungsod sa Balamban; Agosto 30 sa Capitancillo Café and Restaurant sa lungsod sa Bogo, Cebu.
Samtang sa Setyembre 3 sa Bethel Guest House sa syudad sa Dumaguete, Negros Oriental; ug sa Setyembre 4 adto sa MetroCentre Hotel and Convention Center sa syudad sa Tabilaran, Bohol.
Gawas sa paghisgot sa isyu sa pag-adjust sa minimum nga suholan, pangayoon usab sa Board ang posisyon sa mga stakeholder sa posibleng pagpayano sa batakan sa suholan.
Sa pagkakaron, ang Rehiyon 7 adunay unom ka managlahing rates, ang ikatulo sa pinakadaghang minimum wage rates sa tibuok nasod.
Ang public hearing kabahin sa mandato sa Board sa pagrepaso matag karon ug unya sa minimum nga suholan sa rehiyon ug kung gikinahanglan, sa pag-isyu og wage order, pag-adjust sa mao gihapon.
Ipahigayon ang public hearing aron pagtigom sa kinatibuk-ang sentimento sa mga hingtungdan nga stakeholders nga pagatagdon sa diha nga ang Board mohimo sa iyang desisyon sa ulahi.
Ang Rule III, Section 3 sa NWPC Guidelines No. 3, Series of 2020 (The Omnibus Rules on Minimum Wage Determination) nagtugot sa pagpahigayon sa Public Hearings 60 ka adlaw sa dili pa ang anibersaryo sa kasamtangang Wage Order.
Ang kasamtangang wage order, Wage Order No. ROVII-24 miepekto niadtong Oktubre 1, 2023, Agosto 2, 2024 nagtimaan sa pagsugod sa 60 ka adlaw nga panahon diin ang usa ka public hearing mahimong ipahigayon.
Ang pagdungog bukas sa tanang interesadong partido ug gi-awhag ang pre-registration sa https://bit.ly/RB7PublicHearing.
Ang pagsumite sa mga papel sa posisyon gidasig usab.
Ang sama mahimong personal nga isumiter sa RTWPB 7, 6th Floor, DOLE Building, Gorordo corner Gen. Maxilom Avenue, Cebu City, Cebu, o pinaagi sa e-mail sa [email protected] gikan Agosto 02, 2024 hangtod Sityembre 06, 2024. (ECB/PIA7-Bohol)
