TAGBILARAN CITY, Bohol (PIA) — Gipagawas na sa Civil Service Commission (CSC) ang listahan sa mga testing centers ug mga pahinumdom alang sa tibuok nasod nga Career Service Examination – Pen and Paper Test (CSE-PPT) sa Agosto 11.
Gi-awhag ni CSC Chairperson Karlo Nograles ang 358,651 nga mokuha sa pasulit sa Professional o Subprofessional Level exams nga i-review ang Examination Advisory 11, s. 2024 ug pag-akses sa ilang gitudlo nga eskwelahan pinaagi sa Online Notice of School Assignment (ONSA) nga anaa sa CSC website.
Gipahinumduman ang mga examinees nga kinahanglang naa na sa testing venue dili molapas sa 6:30 a.m., o sumala sa gikinahanglan sa CSC Regional/Field Offices.
Ang mga gates sa testing venues sirad-an sa mga examinees sa eksaktong alas 7:45 sa buntag. Ang mga lugar sa eksaminasyon hugot nga magpatuman sa “No ID, No Exam” nga palisiya.
Kinahanglang magpakita ang mga examinees og balido nga ID card sa adlaw sa eksaminasyon, mas maayo ang parehas nga ID card nga gipresentar atol sa pag-file sa aplikasyon.
Kung ang ID card lahi sa ID card nga gipresentar sa panahon sa pag-file sa aplikasyon, ang examinee kinahanglan nga magpakita sa bisan unsang gidawat nga ID card alang sa eksaminasyon sa serbisyo sibil.
Ang CSC nagpahinumdom sa mga mokuha sa pasulit nga ang paggamit sa mga calculator sa CSE-PPT dili tugotan.
Dugang pa, gidili usab ang paggamit sa bisan unsa nga mga tabang sa pagtubag sa eksaminasyon, sama sa mga calculator sa relo, tablet, libro, ug uban pang materyales o gadgets.
Dugang pa, ang pagdala sa test booklet gikan sa testing room o venue hugot nga gidili.
Gidili usab ang mga examinees nga magdala og mga electronic device sa ilang mga lingkoranan, sama sa cellular phones, smartwatches, o uban pang gadgets nga magamit sa pagkuha sa audio o video recording sa bisan unsang bahin sa test materials o sa proseso sa eksaminasyon.
Ang paggamit sa bisan unsang papel, parte sa lawas, sinina, o sa kilid ug likod nga panid sa Answer Sheet alang sa scratch work hugot nga gidili.
Gitambagan ang mga examinees nga gamiton lamang ang mga gitakda nga mga luna sa mga panid sa Test Booklet alang sa bisan unsang scratch work.
Gi-awhag usab ang mga examinees nga mogamit og transparent bags alang sa ilang mga butang ug magsul-ob og angay nga sinina sa adlaw sa eksaminasyon, mas maayo nga plain white shirts o tops. Ang walay bukton nga kamiseta o blouse, shorts, tokong pants, ripped jeans, ug tsinelas hugot nga gidili. Ang taas nga buhok kinahanglan nga ihigot sa likod.
Itom lamang nga mga ballpen ang gitugotan nga gamiton sa pagpuno sa answer sheets. Ang mga gel pen, sign pen, fountain pen, friction pen, o bisan unsang klase sa pen, lakip ang ubang mga kolor, wala gitugot.
Ang mga examinees nga dili maka-akses sa ilang ONSA kinahanglang direktang mangutana sa CSC Regional o Field Office nga hingtungdan, motawag o mokontak sa Contact Center ng Bayan sa 0908-881-6565, o magmessage sa opisyal nga CSC Facebook Page sa https://www. facebook.com/civilservicegovph/.
Ang kompletong listahan sa mga pahinumdom, lakip na ang scope sa eksaminasyon, mahimong ma-akses gikan sa CSC website sa www.csc.gov.ph. (ECB/PIA7-Bohol)
